“Deputadu FRETILIN Konsidera Ema Kruptor Mak Ameasa KAK”

.

Jornal Nacional Diario - Kinta-feira, 07 Marsu 2013 

Reprezetante Povu iha Uma Fukun Parlamentu Nasional (PN), konsidera ema korupto mak halo ameasa hasoru Komisaun Anti Korupsaun (KAK), tanba nia senti an katak nia halo duni korupsaun. 

Deputadu Bancada FRETILIN, Estanislau Aleixo da Silva hateten, ema ne’ebe halo ameasa ba KAK, ne’e sinal katak, KAK halo duni nia servisu hodi buka lia los. 

“Se de’it mak halo ameasa ida ne’e, hau hanoin nia halo ona sala boot ida hanesan korupsaun, tanba ne’e maka nia buka atu ameasa KAK, maibe hau fiar katak KAK sei halo nafatin ninia kna’ar,” dehan Deputadu Estanislau da Silva ba JNDiario, Sesta (01/3) iha Parlamentu, relasiona ho deklarsaun Komisaun KAK Aderito de Jesus Soares ne’ebe hateten katak, sira hetan ameasas ema deskoinesidu balun. 

Hanesan fo sai iha Jornal ne’e, iha edisaun 22 Fevereiru 2013, Komisariu Aderito de Jesus rekonese, KAK hetan ameasa directa no inderencta husi ema deskonesidu balun, tanba relasaun ho kazu korupsaun sira ne’ebe mak durante ne’e KAK halo investigasaun. 

Ameasa sira ne’ebe mak durante KAK hetan mak liu husi Short Mensagen Service (SMS), ho lia fuan tolok, soe piadas, balun baku komisariu nia kareta, balun hasai lia fuan ne’ebe ninia intonasaun ne’e atu halakon ema nia vida. Ameasa hirak ne’e mos la’os diriji ba komisariu de’it, maibe ba mos Funsionariu KAK nian balun. 

Komisariu Aderito de Jesus rekonese, maske hetan ameasa maibe la lori ba kestaun, tanba hakarak serivu publiku ho justu no lia los. “Dala ruma ami simu SMS ne’e normal de’it, tanba ita fo fiar ba publiku i publiku mos hakarak ita atu servisu diak, neebe ami hanoin ida ne’e normal de’it ba ami,” hateten Komisariu Aderito de Jesus Soares ba Jornal Nacional Diario iha Farol, Dili, Kinta (21/2). 

Ho ida ne’e deputadu Estanislau da Silva hateten, instituisaun defeza no seguransa sei fo protesaun maka’as nafatin ba KAK atu nune’e sir abele hala’o hodi kontrola koruosaun ne’ebe agora dadaun ne’e mosu iha rai doben ida ne’e. 

Deputadu ne’e dehan tan katak, koruptor se de’it maka na’ok estadu nia osan hodi prejudika povu nia moris, KAK tenki Investiga hodi lori ba prokurador Jeral no Tribunal hodi halo julgamentu. 

Estanislau da Silva mos hatutan, labele fo sala ba KAK, tanba KAK ninia kna’ar la’os atu kondena ema ne’ebe halo korupsaun, maibe kna’ar KAK nian maka atu halo investigasaun, i Tribunal mak sei kondena ema ne’e halo duni korupsaun ka la’e. 

Reprezetante povu iha uma fukun PN ne’e haklean tan katak, hanesan Timoroan labele rai doben ida ne’e ba ema selukmai buka atu ameasa hodi hatauk povo iha rai ida ne’e. 

Tanba ne’e, Deputadu husi bancada FRETILIN ne’e husu ba KAK labele tauk atu hala’o nafatin sira nia kna’ar ho impersialidade politika no buka atu identifika ema sira ne’ebe halo korupsaun hodi lori sira ba Ministeriu Publiku atu hatama sira ba Tribunal. 

Nia realsa, ema ne’ebe halo ameasa ba KAK, nia tenki hanoin dala rua, tanba ameasa KAK ne’e lalos ona. 

,