Deklarasaun Dili: Esperansa Nasaun Ki’ak ba Apoiu UE

,

Jornal Independente - Husi: Eugenio Pereira - 01-03-2013 

DILI: PALOP Timor-Leste no Uniaun Europeia (UE) konsege aprova dokumentu ne’ebé hanaran ‘Dili Deklarasaun’ ne’ebé unifika nasaun ki’ak sira nia programa ba UE hodi kontinua fó apoiu. 

PALOP Timor-Leste envolve nasaun ki’ak sira ne’ebé hamahan aan iha Komunidade Pais Língua Portugés (CPLP) hanesan Timor-Leste, Mosambike, Guinea-Bisau, São Tome Principe, Angola, no Cabo Verde Dokumentu “Dili Deklarasaun” aprova husi Embaixadora Delegasaun Uniaun Europeia Sylvie Tabesse, Vise Ministru Negósiu Estranjeiru no Kooperasaun Timor-Leste Costancio Pinto, Ministra Negósiu Estranjeiru São Tome Principe Natalia Umbelina Neto, Vise Ministru Negósiu Estranjeiru Mosambike Henrique Banze, Embaixadora Bruxelas Cabo Verde Maria de Jesus Mascarinhas, Embaixadora Bruxelas ba Angola Elisabet Simbrão no membru PALOP sira iha Otel Timor, Dili, Kinta (28/2). Dili Deklarasaun akumula pontu importante lima (5) hanesan 

(1) Reafirma halo vontade polítika ne’ebé aas hodi reforsa kooperasaun entre PALOP no UE ba interese komun; (2) Ajusta servisu UE hanesan iha pasadu no tenke kontinua halo tuir kooperasaun ho PALOP wainhira programa rejionál fó ona dotasaun finanseira kona-ba espesifikasaun ruma tuir deklarasaun ne’e; (3) Implementa prinsípiu konsentrasaun temátika husi kooperasaun iha área promosaun dezenvolvimentu umanu no aprofunda demokrasia ho ajenda atu halo mudansa; (4) Hadi'a mekanizmu governasaun no jestaun ho institutu ho motivu garante ba efikásia, efisiénsia, ho valór ne’ebé akresenta no mós impaktu kooperasaun PALOP iha UE; (5) Mandatu ba programa kooperasaun PALOP ho UE ba koordenadór Mosambike atu fó deklarasaun iha tempu badak hodi tranzmite ba prezidente UE no altu UE iha rai li'ur hodi reforma mós polítika seguransa komisáriu europeia ba dezenvolvimentu. 

Hafoin aprovasaun dokumentu ne’e, embaixadora delegasaun UE, Sylvie Tabesse informa, UE fó apoiu fundus no ajuda tékniku inklui rekursu umanu ba nasaun PALOP hodi aselera dezenvolvimentu ba nasaun sub-dezenvolvidu. 

“Ami iha kometimentu atu kontinua fó suporta hodi pais sira alkansa lalais iha dezenvolvimentu, no Uniaun Europeia mós sauda deklarasaun Dili ne’ebé pais PALOP sira asina ona hodi hametin liu tan pás no dame iha Timor-Leste, no UE sei apoiu nafatin prosesu demokrasia iha pais hotu,” dehan Sylvie. 

Iha fatin hanesan, Vise MNEK, Costancio da Costa Pinto dehan programa kooperasaun PALOP, TL no Uniaun Europeia (EU) importante tebes ba prosesu dezenvolvimentu polítika iha TL. 

“Enkontru ne’e tanba Timor hola parte iha PALOP entre nasaun sira ne’ebé ko'alia lian Portugés iha Afrika no Timor sai membru PALOP 2007, sira mai hodi diskute programa projetu sira ne’ebé hetan apoiu husi Uniaun Europeia,” dehan Costancio. 

Tuir nia enkontru PALOP ne’e hahú iha loron 25-28 fulan ne’e hodi tékniku sira diskute no aprova programa projetu inklui buka fundus foun atu implementa projetu apoiu eleisaun jerál iha rai idak-idak nian no projetu dezenvolvimentu seluk tan. 

“Ohin tékniku sira diskute hodi buka fundus foun hodi apoiu iha projetu importante 5 hanesan programa eleisaun, programa apoiu institutu no programa seluk tan,” nia informa. 

Costancio hatutan, EU envolve hotu iha enkontru PALOP hodi fahe mós sira nia hanoin no programa sira ne’ebé EU sei fó apoiu ba nasaun membru PALOP. Ministru Negósiu Estranjeiru Mosambike, Hendrique Banze dehan, ho dokumentu deklarasaun Dili bele reforsa liu tan kooperasaun vontade rai idak-idak atu hadi'a dezenvolvimentu liu husi apoiu UE. 

“Dokumentu deklarasaun Dili ne’e ohin aprova hodi kontinua husu atu EU bele fó apoiu ba PALOP hodi bele hala'o dezenvolvimentu,” dehan Ministru Hendrique. 

Nia dehan, nasaun sira iha PALOP iha kometimentu atu hametin nafatin lasu polítika amizade, kultura hodi hametin liu tan pás no dame. 

PR Taur Husu PALOP Reforsa Malu Iha parte seluk, Prezidente Repúblika Taur Matan Ruak dehan PALOP importante ba Timor-Leste hodi apoiu dezenvolve polítika iha instituisaun hotu no sosiedade. PR Taur mós kongratula UE ne’ebé fó apoiu ba programa PALOP Timor-Leste, tanba iha tinan 20 liu ba PALOP moris iha relasaun ho UE hodi haree ba perspetiva futuru ba pais membru sira ho potensiál liu tan ba nasaun bilaterál. 

Nia dehan, ho enkontru PALOP ne’ebé partisipa husi nasaun 6 sei justifika planu no ezisténsia ba programa membru sira hodi kompleta liu tan relasaun nasaun sira no reforsa prinsípiu hodi respeita valór demokrasia, estadu de direitu ba povu no dezenvolvimentu. 

PR Taur dehan, husi dokumentu Dili Deklarasaun nasaun PALOP sira ho apoiu UE bele ajuda normalija situasaun seguransa sivíl, militár no no estadu Guinea-Bissau. Hafoin asina dokumentu Dili Deklarasaun, PR Horta ho Prezidente Tribunál Rekursu Timor-Leste Claudio Ximenes no membru PALOP sira ko'a dose hodi selebra aniversáriu PALOP ba tinan 20.

.