David Diaz: “Ukun Nain Mak Fo Espasu Ba Violensia”

.

Jornal Nacional Diario - Tersa-feira, 05 Marsu 2013 

Deputadu husi bancada FRETILIN, iha uma fukun Parlamentu Nasional (PN), David Diaz Ximens, konsidera ukun nain sira mak fo espasu ba violensia mosu beibeik iha rai laran hanesan oho malu nafatin no violensia sira seluk. 

Nia hatutan, ikus-ikus ne’e ema oho malu aumenta tanba realidade hatudu, kuandu iha tempu kalan Polisia sira la movimentu hodi kontrola povu. 

 “Depois mak ita dehan katak, tenki taka artemarsiais, oinsa mak taka kuandu ita mak fo oportunidade ka espasu, kuandu ema bo’ot hau nia maluk ida, hau tenki defende ida ne’e artemarsiais sala maibe polisia la sala,” dehan david Diaz ba Jornalista, segunda (4/3) iha Parlamentu Nasional. 

Tuir David, labele halo fali Polisia ne’e ba gistu pessoal, tanba Timor ne’e laos empreza particular, maibe Timor ne’e Timoroan tomak ninian, ne’ebe povu presiza iha direitu ba seguransa. 

David dehan, ema boot sira la interese seguransa ba povu tanba sira iha ema atu halo seguransa ba sira nia aan rasik. 

“Dala ruma ema sira ne’ebe hetan ataka husi ema balun, oras ida liu tiha mak Polisia foin mosu, no dala ruma povu hein polisia la ba, povu sira mai rasik iha kuartel jeral PNTL, Polisia sira ne’e toba hela,” dehan David. 

Tanba ne’e, nia husu ba Sekretariu Estadu Seguransa atu monta polisia hodi halo kontrola iha tempo kalan, maibe labele uza kareta tenki la’o de’it. 

David hatutan, kuandu investor sira haree seguransa ne’e mak seidauk 100% diak, sira sei la mai investe iha nasaun ida ne’e. 

 Iha sorin seluk, Deputada fernanda Lay husi bancada CNRT hateten katak, kuandu hakarak investimentu la’o maka’as iha Timor Leste seguransa tenke estabel. Ba oin, deputada Fernanda Lay, sei husu ba komisaun B Parlamentu Nasional, trata asuntu Defeza, Seguransa no Relasoens Externa atu bolu urzente Sekretariu Estadu Seguransa, Francisco Guterres ho Komandante jeral PNTL Longuinhos Monteiro, atu esplika lolos situasaun ida rai laran nian ba povu tomak. 

,