CPD-RDTL Rejeita Desizaun La-Sama “La Uza Forsa”

.

Jornal Timor Post - Kuarta-Feira, 20 Marsu 2013 

Veteranus no kombatentes ne’ebe iha Consellu Popular Demokratika-Republika Demokratika Timor Leste (CPD-RDTL) nian mahon rejeita totalmente Vice Primeiru Ministru Fernando La-Sama de Araujo ho nia grupu ne’ebe reprezenta governu tanba laiha baze juridiku. 

 “Rezolusaun ne’e hatu’un laiha karimbu no laiha asinatura husi Xanana Gusmao nu’udar Primeiru Ministru no mos la fo kondisaun ba grupu military no veteranus ne’ebe Xefi Estadu no Primeiru Ministru koloka iha Fatuberlihu,” Deklara Portavoz CPD-RDTL Gil Fernandes da Costa liu husi konferensia imprensa ne’ebe hala’o iha sede CPD-RDTL husi suku Welaluhu, Sub Distritu fatuberlihu, Distritu Manufahi. 

 Iha biban ne’e, Gil mos lamenta ho polisia nia atuasaun repreziva hasoru veteranus no kombatentes ne’ebe halo koperativa iha Welaluhu, nia hatutan, polisia sira ba estraga hotu produsaun batar, lakeru, tomete, aifarina, no obriga membru hirak ne’e sai husi fatin ne’eba no abandona produsaun ne’ebe mag governu atu hola. 

Entertantu, koordenador Jeral CPD-RDTL Antonio Aitahan-Matak ba Timor Post, tersa (19/3) iha sede balide katak, nia rejeita desizaun ka rezolusaun ne’ebe dezliga ba lei. 

 Nia informa, membru CPD-RDTL ne’ebe mak hetan agresaun fiziku husi membru PNTL hamutuk nain 10 no balun kanek, no member balun oras ne’e dadaun iha hela sela eskuadra Polisia PNTL atu tuir enkeretu. 

“Ameasa riah ona, hau iha JNDiario dehan hau sei mate, hau tauk mosu fali krizi 2006, tanba ne’e maka hau kumpriende sa’e deit kareta fila mai no kumpriende situasaun,” Aitahan Matak dehan. 

Nia esklarese, membru CPD-RDTL ne’ebe mak halo koperativa iha Welaluhu retira total ona maibe plantasaun ne’ebe sira kuda oras ne’e estragus hotu. 

“Akontesementu ne’e sai hanesan segundu istoria ba Timor Leste tanba governu ida hola desizaun ba estraga komun idade nia plantasaun, tanba ne’e povu mak tenke matan moos no neon na’in,” Matak Tenik. 

Entertantu, iha biban seluk, Sosiedade sivil eziji ba estadu atu labele hamate inisiativa CPD-RDTL ne’ebe halo ona kooperaiva durante fulan 4 iha Sub Distritu Welaluhu. 

Tuir sosiedade sivil nia haree katak, CPD hatudu ona sira nia inisiativa durante fulan 4 iha ub Distritu Welaluhu, hodi kuada haree hectares lubuk ida, tanba ne’e, loloos estadu labele taka matan ba inisiativa CPD nian ne’e, basa inisiativa CPD nian ne’e maka baibain ema bolu dezenvolvimentu mai husi kraik. 

“Se inisiativa mai husi kraik, loloos governu tenki apoiu no agora tenki iha planu oinsa komina inisiativa CPD nian ne’e, se sira mai husi suku ida-idak estadu tenki koordena ho Xefe suku sira hodi loke koperativa iha baze no loke mos koperasi Unit Desa (KUD) hanesan tempu Indoensia nian ne’e para CPD sira produs tau iha KUD, governu ba sosa,” Diretor ezekutivu Luta Hamutuk (LH) Mericio Akara ba Timor Post iha nia kna’ar fatin, farol, TErsa (19/3). 

.