“CPD-RDTL Ameasa Lori Eladio Faculto Ba Tribunal”

.

Jornal Timor Post - Kuarta-Feira, 13 Marsu 2013 

Konsellu Popular Demokratika-Republika Demokratika Timor Leste (CPD-RDTL), ameasa sei lori membru Parlamentu Nasional (PN) husi Bancada FRETILIN, Eladio Faculto ba Tribunal, kuandu akuzasaun ba membru CPD-RDTL halo abuzu sexual laiha faktus. 

 “Kuandu akuzasaun ne’ebe mak la loos no realidade la hanesan ne’e, ami sei lori nia (Eladio) ba Tribunal para halo deminizasaun tanba nia (Eladio) halo foer organizasaun nia naran,” dehan Kordenador jeral CPD-RDTL Mario dos Reis, ba diario ne’e hafoin hala’o konferensia imprensa, iha Sede CPD-RDTL Balide, Dili, Tersa (12/3). 

 Tuir kordenador CPD-RDTL ne’e katak, informasaun ne’ebe deputado Eladio fo sai iha Parlamentu nasional, hanesan akuzasaun falsu hasoru CPD-RDTL, no sira konsidera ne’e hanesan propaganda no generalidade hodi nune’e bele fo dalan ba polisia atu halo atuasaun ba membru CPD-RDTL iha Suku Welaluhu, sub Distritu Fatuberlihu, Distritu Manufahi. CPD-RDTL mos ejiji ba vitima ne’ebe hetan abuzu sexual husi membru CPD-RDTL atu hato’o keixa ba Polisia no Tribunal, karik identifika membru CPD-RDTL halo duni abuzu sexual. 

“Se karik membru CPD-RDTL halo duni abuzu sexual ne’e, ami husu para vitima ne’e halo keixa ba Polisia, no ami pronto atu kopera ho polisia para entrega membru sira ne’e tuir lei ne’ebe iha,” dehan Koordenador CPD-RDTL. Durante CPD-RDTL halo atividadekoperativa iha Welaluhu, tuir kordenador ne’e katak seidauk iha akontesementu hanesan akuzasaun ne’ebe depurtado Eladio fo sai iha Parlamentu Nasional. 

CPD-RDTL konsidera ne’e sein iha investigasaun klean kona-ba atetude ne’ebe deskonfia husi membru CPD-RDTL. Ne’eduni, sira husu ba Deputado Eladio Faculto husu ba orgaun kompotente atu halo investigasaun ba kazu refere, hodi nune’e bele identifika lolos. 

Maske Eladio konsidera laos CPD-RDTL mak halo, maibe nia deskonfia elemntu balun mak involvidu iha laran, tanba ne’e presija halo investigasaun hodi hatene individual ne’e. 

 “Sira lori hau kona ba saida? so ke hau hetan informasaun hau hato’o iha plenaria atu investigasaun no laos sira atu mai lori fali hau ba tribunal, tanba laos hau mak akuza sira, hau akuza problema ida ne’ebe mak mosu ne’ebe relasiona ho grupu ka elementu balun ne’ebe involvidu iha ne’eba, se sira hakarak lori hau ba Tribunal klaru katak, ne’e sira nia direitu mash au hakarak hateten katak, ema kuandu koalia hanesan ne’e entaun ne’e defesa la los,” dehan Eladio. 

.