“Bandu Prizioneira Konvoka Konferensia”

,

Jornal Timor Post - Kuarta-feira, 06 Marsu 2013 

Diretor Nasional Servisu Prizionais no Reinserasaun Sosial, Helder Cosme Marcal Belo hateten, regra servisu prizaun laiha autorizasaun ba kualker prizioneiru atu halo konferensia inprensa ka konvoka media. 

“Regra Prizaun hatudu prizioneiru labele konvoka media hodi halo konferensia imprensa,” nia dehan ba Timor Post Via telefone, Tersa (05/3). 

Cosme hato’o kestaun ne’e relasiona ho Estetmentu kondenada eis Ministra Justica Lucia Lobato ba publiku katak, iha tempu besik Konsellu Superior Majistratura Judisial (CSMJ) la bolu nia mai hatudu faktus, nia rasik (Lucia) sei konvoka media iha prizaun Gleno hodi hateten sai ba publiku spbre injustisa balun ne’e akontese iha nia prosesu. 

Ba asuntu ne’e, diariu ne’e tenta halo konfirmasaun liu husi SMS ba advogada kondenada Lucia Lobatu, Jose Pedro Camoes maibe laiha resposta. Iha parte seluk, Xefi Prizaun Gleno Cristiano Salsinha hateten, kondenada Lucia Lobato to’o oras ne’e la uza farda prizioneira ho razaun Stok farda refere iha prizaun gleno hotu ona. 

Nia parte halo ona proposta mai nasional hodi husu atu sosa farda ba prizioneirus maibe to’o agora prizaun hotu sidauk simu farda foun ba prizioneirus hotu. 

 “Farda ba prizioneiru Lucia Lobato loloos metan, maibe tanba iha ami nia armazen farda laiha ona, entaun mezmu nia tama prizaun fulan rua ona mos nia labele hatais faru prizioneiru nian,” nia esplika. 

.