Autoridade Manufahi Apoiu Evakua CPD

.

Jornal Independente - Husi: Jorgino dos Santos - 06-03-2013

DILI: Autoridade Distritu Manufahi fó apoiu masimu ba Polisia Nasionál Timor-Leste (PNTL) atu halo evakuasaun ba grupu Consello Popular Democratika-Republika Demokratika Timor-Leste (CPD-RDTL) ne’ebé hala’o atividade kooperativa iha Welaluhu, sub-distritu Fatuberliu.

Adjuntu administradór distritu Manufahi, Arantes Isaac, informa, nia parte hetan orientasaun husi Sekretariu Estadu Desentralizasaun Administrativa (SEDA) katak Konsellu Ministru hasai ona rezolusaun atu hasai grupu CPD-RDTL husi Welaluhu.

Inprinsipiu, Arantes dehan, nia parte konkorda ho desizaun ne’ebé governu foti tanba durante ne’e iha keisa barak husi komunidade sira, liuliu iha sub-distritu Fatuberliu, kona-ba prejensa grupu CPD-RDTL.

“Ha’u hakarak dehan katak laos ami la gosta grupu CPD tanba sira mós timor-oan hotu, so que maluk CPD ba (Welaluhu) laiha koordenasaun di’ak ho komunidade, inklui autoridade sira,” dehan nia liu husi telemovel ba jornál INDEPENDENTE, horisehik.

“Fatin ne’e (Welaluhu) laos abandona, fatin ne’e komunidade sira uza hodi halo toos no natar no haki’ak animal,” adjuntu administradór ne’e hatutan.

Durante prejensa CPD, nia dehan, komunidade sira lamenta tanba sira sente laiha liberdade atu ba toos ka natar no ba haree sira nia animal.

“Tuir informasaun husi administradór sub-distritu Letefoho, inklui komunidade sira (prejensa CPD) negativu tanba laiha liberdade ba komunidade sira atu haree animal no toos,” katak nia.

Informasaun hirak ne’ebé parte administrasaun distritu simu, Arantes hateten, nia parte enkamiña ba governu liu husi SEDA.

Antes ne’e, nia lembra, nia parte esforsu aan hodi halo dialogu ho parte CPD atu buka solusaun, maibé la konsege hetan.

Bainhira jornál tenta halo konfirmasaun ho parte PNTL distritu Manufahi, maibé komandante PNTL distrital rejeita atu fó informasaun ho razaun nia parte la hetan autorizasaun husi komando jerál atu fó informasaun ba media.

“Laiha autorizasaun (ba) ami (atu) fó informasaun, husu direita ba komando jerál iha Dili,” katak komandante ne’e.

Tuir fontes konfirmadu husi Welaluhu ba INDEPENDENTE horsehik katak, oras ne’e polisia hala’o ona passa ravista ba ema ne’ebé tama sai iha fatin konsentrasaun CPD. Laiha konflitu fiziku ruma no situasaun emjeral sei la’o hakmatek. 

Konsellu Ministros hasai rezolusaun hodi fó mandatu ba Polisia Nasionál Timor-Leste atu hapara atividade CPD-RDTL iha Welaluhu, tanba prezensa CPD halo komunidade moris iha traumatizada.

Antes uza forsa hasai CPD, polisia sei halo aproximasaun ho autoridade local sira, uza obrogatoriu karik akontese konlitu fiziku mak sei uza forsa halo evakuasaun.

.