“Assume Komjer PNTL Ba Dala Rua Kontra Lei”

,

Jornal Nacional Diario - Kinta-feira, 07 Marsu 2013 

Iha uma fukun Parlamentu Nasionap (PN) Deputadu Incio Moreira husi Bancada FRETILIN hateten katak, dala barak pozisaun politika sira ne’e politikamente iha interese, ida ne’e mak kestaun bo’ot ida ba nasaun ida ne’e. 

“Hau hanoin kuandu kargu sira hanesan ne’e interese privadu ne’e lalika tama, ita tenki tau duni ema ne’ebe iha responsablidade, servisu duni ho professional, servisu tuir atu nune’e servisu hotu bele lao ba oin,” dehan nia. 

Nune’e mos, deputadu husi bancada CNRT, Arao Noe hateten katak, lei bandu maka’as atu komandante Jeral PNTL, komisariu Longuinhos monteiro assume hikas fali kargu bad ala rua. “Lei mos taka ona dalan ba komandante Jeral PNTL atu mantein nia pozisaun, tanba lei hateten ona katak, Komandante PNTL nian mandatu tinan 2 deit,” Sublinha Arao Noe ba Jornal Nacinal Diario, Tersa (05/3) iha Parlamentu Nasional. 

Nia hatutan, tanba ne’e PN hanoin katak, komandante jeral PNTL tenki mai husi kareira professional Polisia ninian, atu nune’e bainhira hala’o ninia servisu la haree ba politika, maibe haree los ba lei no orden ne’ebe nia hakna’ar an ba. 

Entertantu, Governu Konstituisaun ba dalima seidauk iha desizaun formal kona-ba oinsa atu troka Komandante Jeral PNTL, komisariu Longuinhos Monteiro, husi nia kargu neebe sei remata iha fulan Marsu, tinan ne’e. 

“Seidauk iha desizaun, husik lai ita lalika antisipa buat barak ita lao ho didiak prosesu ne’e internalmente, ida ne’e ami sei anunsia ba imi aban bain rua imi lalika hakfodak, nakdedar mai koalia, agora ida ne’e governu seiduak koalia buat ruma,” dehan Sekretariu Estadu Seguransa (SES), Francisco Guterres ba Jornalista sira, Tersa (05/3) iha Palacio Governu. 

 SES rekonese, oras ne’e dadaun publiku hein hela kona ba se-se maka bele assume fali kargu nudar komandante PNTL foun, hafoin mandatu Longuinhos Monteiro remata.

.