“AJAR Konsidera Justisa TL Fraku”

.

Jornal Timor Post - Sabadu, 02 Marsu 2013 

Diretor Asia Justica Ard Reshte (AJAR), Jose Luis Oliveira, konsidera funsionamentu oragun justisa iha Timor Leste sei fraku tebes, tanba durante ne’e ema barak sei aproveita uteliza violensia hodi atinji sira nia objetivu. 

Jose hateten, situasaun ne’e akontese tanba kriminozu sira la dun fiar funsionamentu orgaun Judisial atu fornese justica iha rai laran sei fraku tebes. Jose hatutan, ema barak hanoin diak liu buka meus atu halo violensia liu husi oho, tanba haree orgaun justica iha Timor Leste la funsiona efikasia no efisiensia, ema ne’ebe iha osan maka bele asesu justisa, no ema ne’ebe la iha osan hein ba hein, prosesu la lao. 

“Realidade tuir ami nia observasaun durante ne’e akontese ona iha Tribunal, wainhira lori kazu ruma ba prosesu iha Tribunal, kuandu povu baibain kazu ne’e lori tempu naruk foin hetan julgamentu, kazu balun bele lori ro’o tinan 5-6 foin hetan julgamentu, maibe kuandu Ministru ruma lori kazu ba Tribunal, ohin julga aban desizaun hasai ona, situasaun ne’e realidade durante ne’e akontese iha orgaun justica,” hateten Jose ba Timor Post iha loron 26/02). 

.