“TNI Tama Naktuka”

.

Jornal Timor Post - Kinta-Feira, 07 Fevereiru 2013 

Vice Ministru Negosiu Estranjeiru no Kooperasaun (MNEK) Constacio Pinto hateten, rona informasaun katak, Tentara Nasional Indoensia (TNI) tama iha rai naktuka maibe husi ninia parte seidauk hatene motivu, razaun no atividade husi TNI tanba sei hala’o investigasaun hodi buka hatene.

“Ami simu duni informasaun husi komunidade sira Naktuka katak, TNI halo patrolla tama iha area ne’eba, tanba ne’e ami haruka tiha ekipa ida para halo investigasaun loloos para realmente buka hatene sira tama iha ne’eba halo saida, atividade saida no razaun saida mak sira tama,” Costancio Pinto hateten ba Jornalista sira iha Parlamentu Nasional, kuarta (6/2). 

Nune’e, Pinto esplika, pozisaun estadu TL ne’ebe maka hola kleur ona katak, fatin Naktuka forsa Indoensia labele halo patroliamentu tama iha laran. 

“Ida ne’e ita nia desizaun, foin lalais iha Bandung (Joint Border Comite) mos ita levanta no husu para TNI labele tama iha Naktuka,” Vice Ministru dehan. 

“Iha naktuka loloos ita nia polisia mak halo patrolia, tanba ita nia sidadaun hela iha ne’eba, TNI labele tama, maibe tuir informasaun sira tama fali,” nia hateten. 

 To’o Notisia ne’e hatuun, Timor Post tenta halo konfirmasaun ba parte embaixada Indoensia iha TL liu husi telefone no mensajen maibe la konsege hetan resposta. Iha fatin seluk, segundu koamdante Polisia Nasional Timor Leste (PNTL) Afonsu de Jesus hateten ba Jornalista sira katak, sira seidauk simu informasaun husi komandu reijaun autonomia Oe-Cusse. 

“Ami seidauk simu informasaun husi Komandu Distritu Oe-Cusse kona-ba TNI tama iha Naktuka, tanba ne’e lakohi fo informasaun,” dehan nia. 

.