“Tebe Sai Conoco, TL Sei Fa’an Mina Rasik”

.

Jornal Independente - Segunda-feira, 04 Fevereiru 2013 

Timor-Leste sei fa’an nia mina rasik iha area Bayu Undan iha Fulan-Abril tinan ida ne’e hafoin hakotu kontratu ho Kompanhia Conoco Philips. 

Durante ne’e, Governu fo fiar ba kompania Conoco Philips ba fa’an mina ne’ebe esplora iha Tasi Timor tanba infrenta hela rekursu umanu. Lakohi temi detaillu konaba mina ne’e fa’an ba ne’ebe no folin hira, Ministru Petroliu no Minarais Alfredo Pires dehan, iha fulan-Abril tinan ida ne’e prosesu ne’e Timor-oan mak sei jere rasik. 

“Ema seluk (Conoco Philips) fa’an ita nia mina, mais tinan ida ne’e fulan Abril Timor Leste sei faan nia mina rasik liu husi kompania nasional Timor Gap,” dehan Alfredo hafoin asina akordu ho Governu Thailandia (1/2) iha edifisiu MNE. Desizaun ne’e foti, Alfredo dehan, iha rai hotu ne’ebe mak riku mina, nain mak fa;an rasik, no sei kontrola folin hodi fo rendimentu diak liu tan ba estadu. 

“Ita rasik fa’an ita nia mina, sei haree loloos nia folin halo nusa,” dehan Alfredo. Tanba durante ne’e, kompania Conocophilips mak fa’an, Governu Timor Leste selu sira nia kolen. Maske nune’e, Alfredo rekonese sei iha risku, kuandu Timor-oan lakohi badinas. 

.