“Sosiedade Sivil no Publiku Triste Debate OJE 2013 La Nakloke”

.

Jornal Timor Post - Segunda-feira, 11 Fevereiru 2013 

Povu sente triste tebes bainhira debate iha espesialidade orsamentu Jeral estadu 2013, iha Parlamentu Nasional kria fali komisaun iventual hodi debate taka-an ba povu, sosieade sivil inklui media sira la asesu ba informasaun. 

“Ami senti triste tebes, debate osan iha tinan ida ne’e lahanesan tinan uluk ne’ebe nakloke ba publiku bele asesu direta no liu husi Televizaun, maibe agora TVTL mos la fo sai ona,” Augusto M da Costa nuudar populasaun Distritu Dili ba TP iha sabadu Bidau, Dili ho tristeza. 

Nia hatutan, depois OJE ne’e hetan aprova husi PN, maibe tama iha debate espesialidade, publiku liuliu povu presiza akompania osan hira mak aloka ba Ministeriu ka Sekretariu Estadu ida-idak ho montante hira. Enkuantu ONG La’o Hamutuk konsidera debate PN kria komisaun eventual ne’ebe membrus deputadu sira hala’o diskusaun la transparante ba publiku, tanba la fo espasu ba sosiedade sivil no media sira atu asesu. 

“Se orsamentu Jeral atu transparante ba publiku, tenki nakloke ba publiku, deputadu sira tenki fo espasu ba sosieade sivil, no media atu bele asesu, saida maka sira deskute iha komisaun eventual ne’e,” kestiaona peskizador LH Juvinal Iha PN, sesta (08/2). 

Juvunal hatutan, komisaun ne’ebe foin harii iha tinan ne’e, karakteristiku ne’ebe foin harii iha tinan ne’e, karakteristiku ne’ebe ita nota katak primeiru diak, tanba sira bele fo oportunidade ba desizaun ne’ebe mai husi consensus laos maioria maka manda. 

Nia rekonese, prosesu debate orsamentu ne’ebe la publiku maibe envolve de’it ema nivel altu, no politiku nain sira de’it, ninia benefisiu ba dezenvolvimentu mos sei benefisia ba politiku sira deit, la’os rejultadu ba dezenvolvimentu povu nian moris. 

Tan ne’e, La’o Hamutuk sujere atu iha debate orsamentu hanesan ne’e presiza envolvimentu publiku para prosesu ne’e lao trasnparante. Iha fatin hanesan, responde ba preokupasaun ne’e, II Vice Prezidenti Parlamentu Nasional, Aderito Hugo katak, diskusaun Komisaun eventual ne’e tekniku liu, tanba la transparante ba publiku, diskusaun hotu iha KE mak sei lori mai iha plenaria foin bele aprova. 

-