“Sidadaun Estranjeirus Hetan Dokumentus TL”

.

Jornal Timor Post - Sabadu, 16 Fevereiru 2013 

Indoenzia la aplika dupla sidadania, maibe, Timor-oan sira ne’ebe sai ona sidadaun Indonesia kontinua hetan dokumentus Timor Leste hanesan kartaun eleitoral no sertidaun RDTL hodi hetan diretu ba subsidiu terseira idade, subsidiu ba veteranus, no direitu partisipa iha eleisaun jeral. 

Kestaun ne’e, sai preokupasaun ba reprezetante povu sira iha uma fukun Parlamentu Nasional. “Ida ne’e la’os buatos maibe realidade, Timor oan barak ne’ebe hela iha Indoensia iha nafatin direitu ba pasaporte, hetan subsidiu ferik katuas husi governu, simu diretu nuudar veteranus no partisipa iha elisaun,” Deputado Lionel Marcal husi bancada FRETILIN kestiaona liu husi debate espesialidade OJE (15/2) iha uma fukun PN. 

Tanba ne’e, nia husu ba Ministru Justica atu kria mekanismu ida hodi rejolve, tanba povu barak mak oras ne’e sei moris iha situasaun difisil nia laran maibe ema estranjeiru sira aproveita fali situasaun ne’ebe loloos lamerese atu hetan. 

Entertantu, Ministru Justica Dionisio Babo hatete, preokupasaun ne’e loos tanba hirak ne’ebe akontese falta kontrolu husi governu ne’ebe administra husi UNTAET. 

“Durante ne’e laiha sistema ida ne’ebe diak no falta kontrolu husi Governu UNTAET,” Babo dehan. 

Nune’e nia dehan, sistema ne’ebe mak Ministeriu Justica sei alkansa maka sei halo aprosimasaun ho parte migrasaun para kontrolu sidadaun Timor oan sira ne’ebe hela iha rai liur. 

Aleinde ne’e, proposta ne’ebe Ministru Justisa aprejenta ho montante U$17,787 miloens no hetan aprovasaun ho rejultadu votasaun a favor 61, abstensaun 0 no kontra 1.

.