“PR Taur Fo Parabens Ba Xanana-Mari Akatiri”

.

Jornal Nacional Diario - Tersa-Feira, 12 Fevereiru 2013 

Prezidenti Republika (PR) Taur Matan Ruak, fo parabens ba Primeiru Ministru Kay Rala Xanana Gusmao, ho eis Primeiru Ministru Mari Alkatiri, ne’ebe mak simu ona medallha paz nia husi Mr. Salil Wilson ne’ebe mai husi estadus Unidus Amerika. 

PM Xanana ho eis Primeiru Ministru Mari Alkatiri simu medallha ne’e, wainhira estadu Timor Leste simu estatua Sri Chinmoy iha Parlamentu Nasional (PN), sesta (08/2) liu ba. 

 “Hau fo parabens ba lider sira ne’ebe simu medalla paz, Kay Rala Xanana Gusmao no Mari Alkatiri, hau sauda sira nia kontribuisaun boot ba harmonia no paz iha Timor oan sira ninia leet, uluk no mos agora dadaun,” esplika PR Taur Matan Ruak. 

“Maun Boot Xanana, Maun Boot Mari Alkatiri, hau nia hakarak katak, Timor Leste bele konta nafatin ho imi ninia matenek hodi aban bain rua tulun hametin dame, harmonia no unidade, no hau espera katak, ita sei bele serviso hamutuk hodi hasa’e riku soin nasional no harii rai ida ke seguru no riku, ne’ebe ita sei husik hela ba ita nia oan no jerasaun aban bain rua nian,” dehan Ruak. 

Taur Matan Ruak mos relsa katak, Timor Leste lao mesak ona, hamutuk ho Naoens Unidas no Timor Leste atinji ona objetivu ne’ebe mak estabelese. 

“Ita lao mesak no hamriik metin, Nasoens Unidas rekonese rezultadu hirak ne’ebe mak alkansa ona no sira fo fiar mai ita nia kapasidade, rezultadu hirak ne’e hatudu husi ita nia rain nia susesu, no mos organizasaun armonia iha mundo, atu hili Timor Leste sai kandidatu liu atus ida ne’e iha ona,” dehan Taur. 

Tuir xefe Estadu ne’e katak, Timor Leste iha dever atu servisu maka’as hodi kontinua hakat ba oin, no uza tinan 5 to’o tinan 10 tuir mai atu hasa’e Timor Leste no transforma Timor Leste nuudar Simbolu no ezemplo ba milagre paz, harmonia no unidade konsege halo hodi nune’e bele hadia povu nia moris.

.