“PN Preokupa Folin Fos”

.

Jornal Timor Post - Segunda-feira, 11 Fevereiru 2013 

Membru Parlamentu Nasional (PN) preokupa ho folin fo’os ne’ebe as iha merkaduria hodi haterus povu kbiit laek sira. 

“Ita halo komparasaun folin fos iha area rural no urbana ne’e diferente tebes no kuantidade fos moos la to’o, ida ne’e hau preokupa, maibe, Ministeriu Komersiu Industria no Ambiente (MKIA) hatun fali subsidiu importasaun,” dehan Deputadu PD, Virgilio Hornai Iha PN foin lalais ne’e. 

Hornai dehan, iha realidade alokasaun osan U$4 miloens ba MCIA ba kompas fos iha rai liur kompara ho tinan kotuk, iha espetativa garantia ona produsaun rai laran maibe seidauk bele subtitui importasaun husi rai liur. 

Nia hatutan, situasaun sei aumenta grave, tanba realidade orsamentu ne’ebe aloka ba iha Ministeriu relevante para halo distribuisaun fos, maibe osan ba hola fos tun liu fali kompara ho tinan sira ba kotuk. Iha fatin hanesan, Deputadu Francisco Branco husi bancada FRETILIN husu Governu atu halo reflesaun tanba osan barak ona maka gasta iha tinan lima ba kotuk maibe realidade lasatisfas povu nia moris. “

”Hau preokupa iha tinan 2012 fundus infraestrutura, tanba fundus ne’e nakfilak an tiha ba fundu emerjensia ne’ebe benefisia deit grupu oan ida nian,” Francisco lamenta. 

Iha parte seluk, negosiante sira ne’ebe fa’an modo iha Hali-Laran husu ba governu atu tau matan ba sasan folin iha loja, tanba durante semana ida ona senti labele sosa sasan iha loja tanba sasan folin sa’e maka’as.

,