“PM Xanana Orienta PNTL Taka Atividade PSHT No KORK”

.

Jornal Independente - Segunda-feira, 18 Fevereiru 2013 

Ministru Defeza no Seguransa atual Primeiru Ministru Kay Rala Xanana Gusmao fo ona orientasaun ba Komando Polisia Nasional Timor Leste (PNTL) atu kontinua ezekuta despaixu Governu nian despaisu governu nian hodi suspende atividades artimarsiais iha teritoriu Timor laran tomak. 

Tuir despaisu Governu nian iha tinan 2012 ba atividades artimarsiais no arte-ritual katak, suspende provizorio atividade ne’e durante tinan ida hodi haree sira nia komportamentu karik lahamosu kriminal, atividade ne’e bele kontinua la’o nafatin, maibe durante tinan ida mak rezulta hamate ema ida tanba kauza husi atividade artemarsiais mak governu iha kompetensia atu taka totalmente atividade ne’e. 

“Hau hanoin diak liu taka de’it ona tanba sira nia atividade ne’e sempre halo povu mate hela de’it, hau aviza ona ba komando jeral atu ezekuta despaiso governu nian ba atividade artemarsiais iha rai laran,” hateten PM xanana wainhira hatan preokupasaun Bamcada opozisaun liu husi diskusaun komisaun eventual ba orsamentu jeral Estadu tinan 2013 iha Parlamentu nasional, sesta semana kotuk. 

Orientasaun PM Xanana ba PNTL ne’e relasiona ho kazu hamate ema na’in haat (4) iha sama lete, Distritu Ermera foin lalais. Nune’e mos PM Xanana dehan katak, taka artemarsiais sira ne’ebe halo krime hamate povu rai sei la nabeen. 

“Ita taka korka no PSHT ha’u fiar rai sei la nabeen,” hateten gerileiru Xanana ne’e. Entertantu komandante Jeral PNTL Longuinhos Monteiro hatete, antes ne’e governu rasik hasai ona despaisu ida hodi suspende atividade artimarsiais no arterituais iha teritoriu tomak hafoin akontesementu Ponte Comoro ne’ebe envolve mos membru Polisia lubuk ida iha konfortu ne’e. 

“Responsablidade kriminal ida-idak tenke ba hatan no ita identifika ona suspeitu sira hodi ba submete iha prosesu investigasaun tuir ita nia lei nia mandatu,” hateten Longuinhos. 

Antes ne’e, adjuntu komandante PNTL Afonso de Jesus hateten, pronto ezekuta despaisu governu nian ba interese povu nian atu akmatek. 

.