“Pessoa: Lucia Fo Ezemplu”

.

Jornal Timor Post - Tersa-Kalan, 05 Fevereiru 2013 

Prokurador Jerald a Republika Ana Pessoa Pinto hatete, kazu korupsaun ne’ebe maka komete husi membru eis governu ka direitor no poderozu (ukun nain) sira agora dadaun sei iha prosesu investigasaun. 

“Agora Ministeriu Publiku sei halo prosesu investigasaun balun, ita konsidera ema ne’ebe mak iha poderozu (diretor to’o Ministrus-red) bele husi uluk, balun ita dehan importante,” Ana Pesoa dehan ba Jornalista sira. 

 “Ita fo importansia ba Ministrus ka direitor eis Ministru maibe iha kazu balun ne’ebe sei investiga,” dehan Pessoa. 

Ana Pessoa mos informa, kazu korupsaun barak ne’ebe mak envolve husi poderozu kna’ar na’in ezekutivu sira husi governu periodu ba kotuk no ohin loron nian. 

Hanesan ezemplu ida ne’ebe maka iha, husi investigasaun Ministeriu Publiku nian konsege lori eis Ministra Justica Lucia Lobato ba hasoru prosesu justisa no ikus mai kumpri pena ne’ebe maka Tribunal Rekursu fo. 

Tanba ne’e, prokurador hatan ba jornalista sira sobre prosesu investigasaun ba kazu Korupsaun Kolusaun Nepotismu (KKN) ne’ebe maka involve husi eis membru Governu , nia prosesu kontinuasaun ba investigasaun no bainhira maka atu lori ba Tribunal. 

Ana Pessoa hata’an katak, agora dadaun Ministeriu Publiku hala’o hela prosesu investigasaun ba faktus sira hodi portifika. Husu konaba numeru eis membru poderozu no poderoza sira, nia lakohi fo komentariu klaru kona ba numeru serteza. 

“Hau lakohi koalia hira no oinsa prosesu investigasaun, tanba ne’e ita boot sira (Jornalista-red) seidauk fo sai numeru klaru,” nia dehan. Informasaun ne’ebe mak iha katak, komisaun Anti Korupsaun (KAK) halo investigasaun ona kazu korupsaun kuaze 50 no balun investiga ona hodi intrega ba Ministeriu publiku para prosesu tuir lei. 

.