Parlamentu timoroan aprova Orsamentu Estadu nian ba 2013

.

Sapo.tl - Lusa - 19 de Fevereiro de 2013 

Orsamentu Estadu Timor-Leste nian ba tinan 2013 aprova horseik iha parlamentu iha votasaun finál globál, hafoin diskusaun iha espesialidade, ho votu favor 64, iha momentu ne’ebé ministra Finansa timoroan nian, Emília Pires, konsidera hanesan “istóriku” . 

“Hanesan momentu istóriku ida. Ha’u senti satisfeita tanba ne’e hatudu katak ita sai husi frakeza ne’e no iha maturidade Nasaun nian no entre partidu polítiku sira”, ministra timoroan afirma iha sesaun nia rohan. Tuir Emília Pires, Timor-Leste hahú konkorda iha konseitu boot sira.

“Só ho akordu sira ne’e maka ita bele avansa. Ha’u senti hanesan momentu istóriku no ba ha’u, Timor iha dalan loos”, hatutan.

Iha votasaun finál globál ba Orsamentu Estadu nian falta de’it deputadu ida tanba la marka prezensa iha sala.

Deputadu sira na’in 65 reprezenta formasaun partidáriu haat, tolu pertense ba Governu koligasaun nian ne’ebé lidera husi primeiru-ministru Xanana Gusmão husi Conselho Nacional da Reconstrução de Timor-Leste.

Partidu Demokrátiku integra mós iha koligasaun governamentál ho deputadu na’in ualu, no Frente Mudansa ho deputadu na’in rua. Partidu opozisaun úniku maka Frente Revolucionária do Timor-Leste Independente (Fretilin), ho deputadu na’in 25.

Aprovasaun orsamentu nian husi partidu hotu ne’ebé iha parlamentu halo iha sekuénsia kriasaun komisaun eventual ida, proposta husi Fretilin, hodi rekolla no analiza proposta sira alterasaun konsensuál sira ba dokumentu.

Komisaun ne’ebé komposta husi deputadu na’in tolu Fretilin nian, na’in ida husi Conselho Nacional de Reconstrução de Timor-Leste (CNRT), na’in ida husi Partidu Demokrátiku no na’in ida husi Frente Mudansa, servisu durante loron haat no iha loron-kinta liubá aprezenta ida parlamentu testu ida substituisaun nian.

Testu ne’e determina redusaun despeza nian, kompromete Governu atu justifika iha parlamentu nasionál utilizasaun husi osan boot liu dolár millaun rihun 1,3 ne’ebé koresponde ba porsentu 84 husi ezekusaun orsamentál nian.

Deputadu sira aprova Orsamentu Estadu ida ho dolár millaun rihun 1,6 (euro millaun rihun 1,1), menus millaun 100 duké iha proposta dahuluk husi Governu hamutuk dolár millaun rihun 1,7 (besik euro millaun rihun 1,3).
.