“Osan Imprensa Publiku Nakukun”

.

Jornal Timor Post - Sesta-Feira, 15 Fevereiru 2013 

Deputadu FRETILIN Joaquim dos Santos lamenta ho pozisaun imprensa publiku (RTTL) ne’ebe durante ne’e nunka iha transparensia konaba osan ne’ebe sira hetan tinan-tinan husi Governu hodi hala’o sira nia atividades. 

Tuir nia katak, iha regra inprensa publiku nian hateten, labele halo kobransa, maibe iha dokumentu ofisial sir abele halo kobransa. “Ami presiza esklaresementu ba kazu sira nee, tanbasa mak la mosu iha orsamentu Jeral Estadu (OJE), se iha duni sira jere ona ba saida,” nia dehan iha Plenaria Parlamentu Nasional, kinta (14/2). 

Joaquim mos aprejenta dadus katak, RTTL kuandu halo avizu Radiu nian ne’e U$5, Televizaun U$20 kada minutu, se enkuantu publisidade komersial, Radiu kobra U$50 no televizaun U$200 kada minutu. Agora kuandu programa produsaun ruma entaun Radiu mos ho nia kustu U$5 no Televizaun U$20 dolar kada minutu, entertantu, transmisaun direta ba privadu mil U$2 oras ida no transmisaun ba estadu U$1000. 

Purtantu, Joaquim husu ba Ministra Financas no Sekretariu Estadu Komunikasaun Sosial (SEKOS) iha plenaria katak osan sira ne’e para atu halo saida. 

Tuir deputadu ne’e katak, sasan kiik-oan sira ne’e maka sempre hamosu problemas ka deskontentimentu enkuantu la uza tuir politika estadu nian. 

Aleinde ne’e, Primeiru Ministru xanana Gusmao hateten, kona-ba imprezas publikas nian konkorda ho preokupasaun deputadu Joaquim dos Santos nian, tanba durante ne’e laiha kontablidade di’ak kona ba osan sira ne’ebe tama. 

Iha fatin hanesan, Ministra Finansas Emilia Pires esplika katak, tinan ida ne’e imprensa publiku (RTTL) hatama ona sira nia osan iha Banku sentral, maibe, fundus ba IP ho total mil U$225 ne’ebe aloka ba sira tenki hatama kada fulan. 

.