Oho Joven “Oknum PNTL Submete Investigasaun”

.

Jornal Timor Post - Kuarta-Feira, 13 Fevereiru 2013 

Oknum Polisia Nasional Timor Leste (PNTL) ne’ebe oho mate joven ida iha Distritu Oecusse ho razaun ne’ebe la klaru, tanba ne’e, Polisia Investigasaun Kriminal foti ona asaun hodi investiga oknum Polisia ne’e hodi submete ba prosesu investigasaun. 

Komandante Polisia investigasaun Servisu Kriminal, Superitendente Calistro Gonzaga hateten, Hospital halo ona autopsia ba joven ne’e no identifika matebian hetan oho husi oknum Polisia. 

“Ita identifika ona katak, iha duni abuzu poder iha internalmente PNTL, maibe, ita sei bolu oknum Polisia ne’e hodi halo investigasaun,” Calestro ba jornalista iha nia servisu fatin, Kuartel jeral PNTL, Caicoli, (12/2. 

Nia esplika, oknum Polisia ne’ebe oho joven ne’e oras ne’e dadaukl seidauk hetan suspensaun, oras ne’e, suspeitu refere halao hela nia servisu iha lina fronteira Distritu Oe-cusse. 

 “Ami sei ba Oe-Cusse hodi halo investigasaun ba oknum ne’e hodi bele hatene klaru katak, nia maka oho duni ka lae,” Calistro informa. Iha parte seluk, familia matebian Domingos Lafu haktuir kronolojia kazu ne’e katak, iha loron sesta semana kotuk, matebian haksesuk malu ho ema ida depois membru Polisia ho naran Constancio mos ba iha fatin haksesuk malu hodi sotin sira nain rua, maibe derepenti matebian Marcos Bubun fila ba kotuk tuku Polisia ne’e dala ida. 

Nune’e, tanba Polisia ne’e sente moras, Polisia Constancia deretamente tebe matebian Marcos iha hirus matan no seluk tan, asaun polisia ne’e halo matebian dada iis la diak, tanba ne’e familia sira seluk telefone ba ambulansia iha fatin ne’ebe hodi lori mai Hospital referral Oe-cusse, maibe la konsege salva vitima marcos, kazu ne’e akontse iha sub Distritu Pasabe, Distritu Oe-cusse. Domingos hatutan, nia rasik mos la hatene motivu husi kazu haksesuk malu entre matebian ho ema ida seluk, tanba nia la iha fatin iha tempu ne’eba, mate isin oras ne’e dadaun sei iha hela sala motuariu hospital nasional hodi submete ba prosesu autopsia.

,