Odete La Simu; “MS Asai Nia Hanesan Sai Husi Janela”

.

Foto, Tempo Semanal - Odete Viegas.

Jornal Timor Post - Sabadu, 09 Fevereiru 2013 

Diretor Jeral (DJ) Hospital Nasional Guido Valadares (HNGV), Odete da Silva Viegas La simu tebes desizaun Ministru saude Sergio Lobo ho nia Vice nain rua hasai nia kargu derepenti de’it, nia konsidera desizaun ne’e hanesan duni sai nia husi janela. 

Odete afirma, kargu ne’ebe nia lori tanba hetan konfiansa no hetan tomada posse offisialmente iha Mandatu eis Ministru Saude Nelson Martins ho nia Vice madalena Hanjam. 

“Hau mai iha HNGV ne’e tama husi odamatan, maibe agora Ministru Saude Sergio Lobo ho nia Vice nain rua hasai hau husi janela, ne’e hau la simu,” hateten Odete ba Jornalista sira, sesta (8/2), hafoin simu Vise Ministra Etika Prestasaun Saude, Natalia de Araujo ho Francisco Rego ne’ebe atu troka nia iha nia gabineti. 

“Depende de’it Vice Ministra Natalia de Araujo mai ho karta ida dehan katak, atu troka hau husi kargu ne’e, ba hau, kargu ne’e hau bele husik ohin ka aban, maibe tenki ho dignidade,” hateten Odete. 

Odete haktuir, iha kinta (07/2) kalan, Ministru Lobo rasik telefone ba protokolu HNGV nian, Belarminho Carvalho de Araujo, iha oras maizumenus tuku 11:00, hodi fo hatene preparasaun atu simu DJ no Administrador HNGV foun iha loron Sexta (08/2). 

Odete duvida tebes ho intensaun hirak ne’e, tanbasa mak tenki telefone iha kalan. “Tanba saida mak fo informsaun ne’e kalan,” Odete lamenta. 

Nia rekonese mos iha loron kinta (07/2) dader, Ministru Lobo rasik fo hatene ona ba nia katak, iha tempo badak sei troka nia ho Diretor nasional balun tan, maibe, nia hateten, nia la simu wainhira iha loron tuir mai mosu kedas ema foun ne’ebe atu troka nia iha nia gabineti. 

“Hau senti aban troka ohin ita boot fo hatene hau, ida ne’e hau sente la justu karik,” hateten Odete ba Jornalista sira. Tuir Odete, normalmente atu troka diretor ida prosesu tenki liu husi Komisaun Funsaun Publika, no liu husi Konselu Administrasaun hafoin Ministeriu informa antes semana ida ba Diretor ka Funsionariu Publiku ne’ebe atu troka ka hasai. 

.