“MS Reforma Diretor 13”

.

Jornal Timor Post - Kinta-Feira, 14 Fevereiru 2013 

Ministru Saude (MS) Sergio Lobo informa, sistema ne’ebe nia uza hodi halo reformasaun iha Ministeriu laos Birokrasia, maibe, lei komisaun funsaun publiku (KFP) maka fo dalan ba nia, tamba ne’e, nia sei hapara diretores 13. 

 “Hau troka sira tanba sira nia tempu remata ona, ne’e duni hau tenki halo revizaun ba kargu sora ne’e, Ministru Saude ba Jornalista sira iha uma fukun PN (13/2). Sergio hatutan, revizaun ba kargu ne’ebe mak nia halo inklui ba Diretor jeral, Diretor Hospital, Departementu Rekursu Humanu, Aprovizionamentu no Administrasaun. 

 “Molok troka, hau bolu sira ami halo diskusaun atu fo fali tempu ba sira halo kapasitasaun no sira balun kontinua fo fali apoiu ba diretor foun sira,” Sergio dehan. Tuir nia, revizaun ba sistema ne’e hala’o tiha ona, ne’e duni, sesta (15/2) diretor sira sei toma pose tanba karta ofisial husi KFP tun ona. Ministru saude ne’e lakonsidera revizaun ne’ebe nia halo, tanba frakeiza, maibe bazeia ba durasaun tempu ne’ebe kleur ona, tanba ne’e tenki halo revizaun. 

“Agora diretor foun sira ne’e atu assume pasta laos Ministru rasik mak haree, maibe Vice Ministru nain rua no Diretor rekursu humanu. Iha sorin seluk, Sergio mos informa kona ba Vizita Primeira Dama nian iha HNGV, nia hateten, vizita ne’e nia rasik la hatene informasaun. 

 “Hau la rona Primeira dama Vizita Hospital, hau lee fali Jornal maka hau foin hatene,” nia konfesa.

,