“MP Akuza Gil Alves Komete Krimi Burla”

,

Jornal Timor Post - Kuarta-Feira, 06 Fevereiru 2013 

Ministeriu Publiku akuza Eis Ministru Turizmu, Komersiu no Industria (MTCI) Gil da Costa Alves ho krime burla (pngelapan-red) tanba deskonfia uza osan Partidu ASDT ho montante U$195.000,00 ba interese privadu. 

Liu husi audensia julgamentu ne’ebe lidera husi Juis koletivu Jose Maria de Araujo, Duarte Tilman, Julio Gantes, Ministeriu Publiku reprejenta husi Prokurador Jose Ximenes akuza arguidu katak, durante prezidenti ASDT matebian Francisco Xavier do Amaral sei moris, arguidu Gil Alves maka asumi nafatin knaar nuudar Sekretariu Jeral ASDT tuir estatutu Partidu nian. 

Nune’e, mos altura Prezidenti ASDT mate, arguidu mos iha direitu atu kaer pasta hanesan prezidenti ASDT hodi hein kongresu extraordinariu hodi desidi prezidenti partidu. Ho knaar ne’ebe arguidu assume mak iha loron 12 Abril 2012 arguidu haruka karta ba Komisaun Nasional eleisoens (CNE) atu haruka osan ne’ebe apoiu kampania partidu politiku ASDT ba konta Bankaria foun ne’ebe arguidu sira loke. 

 Nune’e, CNE mos halo ona transferensia ba konta bankaria refere, maibe antes akontese kongresu extraordinariu partidu ASDT iha Dare loron 27-28 arguidu sira lakohi partisipa kongresu refere no fo autorizasaun hodi ba halo levantamentu (dada-red) osan ne’ebe iha konta bankaria partidu nia ho fo U$195 mil, no iha loron 31 Maiu 2012 kontinua halo tan levantamentu ba osan ho montante U$45.000 iha banku Mandiri. 

Arguidu sira mos antes ne’e simu ona notifikasaun husi Tribunal no akordaun Tribunal Rekursu ne’ebe hateten, kongresu extraordinariu ne’ebe arguidu sira halo la vale, no kongresu ne’ebe Tribunal rekursu konsidera (legal) maka kongresu ne’ebe realiza iha loron 27-28 Maio 2012 iha Dare ho Prezidenti Partidu ASDT maka Joao Coreia, maibe, arguidu sira kontinua la kumpri hodi halo levantamentu ba osan iha konta bankaria partidu nian hodi halo aktividade seluk. 

Ho faktus hirak ne’e mak Ministeriu Publiku akuza arguidu sira ho krimi burla ne’ebe previstu iha lei kodigu penal artigu 267 alina 4. Hafoin rona akuzasuan husi Ministeriu Publiku, Arguidu Gil Alves desidi nonok hodi fo kompetensia deit ba defensor, maibe, arguidu Henrique desidi hakarak koalia ba tribunal. 

Tan ne’e, liu husi nia deklarasaun hateten, akuzasaun balun loos no barak liu mak la loos tanba osan ne’ebe sira halo levantamentu husi konta bankaria laos ba interese privadu, maibe uza ba arividade partidu nian. 

“Osan ne’e ami selu divida sira ne’ebe durante tinan ida nia laran halo ba atividade partidu nian, ami hateten desizaun Tribunal Rekursu sai ona maibe ceke (cek) banku nia ami asina antes ona hodi foti osan ba selu tusan partidu nian,” deklara arguidu ba Tribunal, Tersa (5/2) iha Tribunal Distrital Dili. 

Arguidu Henrique haktuir katak, mezmu osan balun gasta ona ba atividade partidu nian, maibe, sira konsege fo fila osan restu ba Prezidenti ASDT Joao Correia ho montante $45.000.00 kompostu husi osan cash ho montante U$45.000,00 no osan restu iha konta bankaria partidu ho montante U$5000,00.

.