“Ministra Finansas Aprova Osan Ba Nia Kaben”

.

Jornal Independente - Segunda-feira, 11 Fevereiru 2013 

Prova no faktu ne’ebe iha, hatudu katak, Ministra Finansas, Emilia Pires aprova osan hamutuk rihun US$895.140 ba nia kaben, Warren Macleod (Kompania nain Mac’s Metal Craft), ne’ebe Supply material ba Ospital Nasional Huido valadares (ONGV). 

Tuir lei aprovizionamentu iha artigu 32, Alinea 3, koalia kona ba servisu publiku labele adjudika kontratu ba familia to’o grau rua raan, hanesan ka sosiu konsultor nian ne’ebe envolve hala’o kna’ar ne’ebe-ne’ebe de’it iha prosesu aprovizionamentu. 

Tuir karta kontratu servisu entre Governu ho kompania Mac’s Metal Craft, halo iha loron 11 Abril 2012, maibe Ministra Financas, Emilia Pires aprova ona orsamentu husi fundus kontijensia ba item ne’e iha loron 8 Fevereiru 2012. 

Maski nune’e, Ministra Finansas Emilia pires duun katak, media Timor Leste gosta manipula informasaun hodi hatuun ema seluk. 

“Hau mos haree ho tristeza, dala barak ita nia media seidauk iha kbiit para atu halo jornalizmu investigative ho dadus konkretu saida mak akontese, mais gosta hanesan manipula para atu hatun ema,” dehan Emilia iha uma fukun PN, kuarta (6/2). 

Hataan ba kestaun ne’e, Asosiasaun Jornalista Timor Leste Press Club (TLPC) no Aosiasaun Jornalista Timor Leste (AJTL), kondena tebes estetmentu Ministra Financas Emilia Pires ne’ebe duun Jornalista iha Timor Leste gosta halo manipulasaun hodi hatuun ema nia dignidade. 

Portavos TLPC, Lirio Fonseca, konsidera deklarasaun Ministra Emilia nian ne’e insultasaun no presaun hasoru profisaun Jornalista. 

Nia husu Ministra Emilia lalika jeneraliza media hotu-hotu hakerek notisia arbiru deit, tanba media balun publika kazu alegasaun korupsaun ho konkreta no evidensia bazeia ba entervista lubuk ida ne’ebe sira halo no ninia rezultadu iha tiha ona. 

“See Ministra alerjia ho media nia publikasaun bele lori media ba tribunal hodi nune’e bele komprova faktus loloos,” dehan Lirio, iha Sede TLPC, sesta (08/2). 

Portavos TLPC ne’e mos husu ba Ministra Emilia Pires atu esklarese ba publiku katak, Jornalista ne’ebe? Ka instituisaun media ne’ebe mak manipula informasaun hodi hatuun ema seluk? 

Ministra mos iha diretu atu hato’o nia responde ba akuzasaun hirak ne’e, la’os sees an husi media depois halo deklarasaun hataka profisaun Jornalista nian. 

“Ami Jornalista Timor oan beik teen duni, maibe pelumenus ami fo ona kontribuisaun uituan ba dezenvolvimentu iha rai ne’e,” tenik nia. 

 Koalia kona-ba inkapasidade jornalista, karik kestaun ne’e kompleksu tebes, tanba nuudar Ministra lider ne’ebe diak hanesan Timor oan mos iha responsablidade nian hotu, liuliu ba povu no estadu TL. 

Nune’e, Diretor Tempo seminal, Jose Belo hatete, Jornalista Tempo seminal haruka ona karta pedidu sanulu (10) ba Ministra Emilia atu halo konfirmasaun ba kazu ne’e, maibe karta ne’e nunka hetan resposta, tanba ne’e, Jornal Tempo Semanal desidi hodi hatuun Notisia ne’e. 

Nia hatutan, Nitisia ne’ebe sira hatun kompletu, tanba ne’e, kuandu Ministra Emilia presiza, Tempo Semanal Prontu atu hatudu faktu hirak ne’e, nune’e, pronto atu hataan kuandu hakarak levanta kazu ne’e ba oin. 

"Ami pronto atu hataan kuandu Ministra la satisfas ho notisia ne’e hodi lori ba Tribunal".

.