“Mal Nutrisaun Iha Timor Leste 58%”

.

Jornal Nacional Diario - Sesta-Feira, 01 Fevereiru 2013 

Tuir Estatistika ajensia Internasional ONU nian (UNICEF) katak, fenomena mal Nutrisaun Timor Leste sa’e ona ba 58%, ho Prezensa ne’e hatuur Timor Leste nudar nasaun ne’ebe rai terseiru lugar iha Aziatiku mak moris iha mal Nutrisaun nia laran. 

Mal nutrisaun ne’e afetadu maka’as ba povu kbi’it la’ek nia oan sira iha teritoriu Timor Leste, tanba la konsume hahan ne’ebe ho Nutrisaun. 

Reprejetante UNICEF Honggwel Gao hateten, saude no Nutrisaun diak mak fundamental ba labarik sira nia kresimentu no mos ba dezenvolvimentu kapital umanu nasaun nian. Prevelensia mal Nutrisaun inan ho oan inklui Difesiensi mikronutrisaun iha Timor-Leste a’as tebe-tebes, ne’ebe bazeia ba survey saude demografia Timor-Leste 2009-2010, labarik 6 husi 10 (58%) mak badak liu ka hetan mal nutrisaun kroniku no 19% labarik mak hetan aktu mal Nutrisaun ka krekas liu no 45% mak todan la to’o. 

Entertantu, Vise Primeiru Ministru, Fernando La Sama de Araujo, rekonese katak, mal Nutrisaun sei sai nafatin problema boot ba Timor Leste, tanba labarik tinan lima mai kraikk barak mak liman lotuk, ain lotuk, no kabun tek maran. 

“Hau bolu atensaun ba Ministru saude Sergio Lobo ho nia vise nain rua inkluidu direktores ho staf sira atu nune’e servisu maka’as liu tan hodi redus no prevensaun ba numeru pursentu mal nutrisaun iha Timor Leste,” afirma Fernando La Sama iha nia diskursu wainhira hala’o abertura sorumutu validasaun revizaun estratejiku nasional nutrisaun iha Hotel Timor,” Kuarta (30/1).

.