“Maijen Lere Husu CPD-RDTL Labele Halimar Ho Bandeira RDTL No Hino FALINTIL”

.

Notisia Husi TVTL - Sesta-Kalan, 08 Fevereiru 2013 

Xefe Estadu Maior Jeneral Lere Anan Timur kondena hahalok membru CPD-RDTL ne’ebe nahe Bandeira Nasional iha kareta leten hodi tuur. FALINTIL Forsa Defesa Timor Leste (F-FDTL) hetan evidensia ne’e, wainhira hala’o pasa rebista ba membrus CPD-RDTL iha Sub Distritu Fatuberlihu. 

Bandeira Nasional Timor Leste harii lori ruin no ran, Povu Timor Leste ne’ebe besik rihun atus rua resin ne’ebe mate ba nasaun doben ida ne’e. 

Xefe Estadu maior jeneral F-FDTL Lere Anan Timur hato’o kestaun ne’e ba masa CPD-RDTL iha Trans SP2 Kiras Sub Distritu Fatuberlihu, manufahi. Lere Anan Timur ho lian maka’as hateten, F-FDTL no polisia sira iha evidensia hatudu katak, membru CPD-RDTL balun tuur iha bandeira Nasional nia leten iha kareta laran. 

“Iha revista ida ne’e hetan buat barak, ida, imi nia membru CPD-RDTL nahe Bandeira Nasional iha kareta laran mak tur iha leten, ida ne’e imi sala ona, bandeira ne’ebe imi dada ne’e, ne’e sosa ho ran no ruin, ne’ebe mak ita tenki kuidadu, se imi tuur iha Bandeira Nasional nia leten entaun imi hakarak Bandeira ida ne’ebe, Bandeira ne’e ran nia folin, isin nia folin, tamba bandeira ne’e maka ita nia maluk mate barak, se ema ruma, nasaun seluk hakarak mai embade Timor ita defende bandeira ida ne’e, imi nia maluk sira ne’ebe hatais farda ne’e (F-FDTL) jura ona, hau jura ho hau nia vida tomak hodi defende bandeira ida ne’e, so sira mate mohu maka sama ita nia bandeira maibe enkuantu sei moris ema ida sei la sama, uluk hau ba Lospalos hasoru imi nia maluk CPD-RDTL kanta hau rona hanoin katak kanta Hino das FALINTIL, mais sira muda letras, dehan kaer fali insada, kareta, karau kuda saida sira ne’e, hau dehan hanesan ne’e, Hino FALINTIL ne’e Hino lulik, ema ida labele inventa, imi inventa fali ba kareta, kaer katana, kuda, karau, Hino FALINTIL harii ho ran, ho ruin no isin, ne’e make ma ida labele inventa Hino FALINTIL, imi hakarak halo inventa diak liu halo imi nia ketak, muzika Hino FALINTIL ne’e labele sai fali kareta, sai fali to’os, sai fali natar, Hino FALINTIL ne’e Hino Funu nain laos to’o nain, labuat ida, tamba dala ruma ita lahatene demokrasia, entaun, primeiru imi nuudar Timor nia oan, nuudar mos sidadaun Timor, imi tenki governu ou estadu ida nia okos,” dehan Lere Anan Timur. 

Aleinde ne’e iha pasa revista ne’e, hetan mos membru CPD-RDTL balun lori sasan kroat iha pasta laran. 

“Depois detekta mos imi CPD-RDTL lori rama, kroat,” dehan Lere.

.