“Lere Husu Xanana Hasai Desizaun Klaru Hasoru CPD”

.

Jornal Independente - Sesta-Feira, 01 Fevereiru 2013 

Komandante F-FDTL Maijor jeneral Lere Anan Timur husu Primeiru Ministru xanana Gusmao ne’ebe kaer mos kargu Ministru Defeza no seguransa atu foti desizaun ne’ebe klaru no lalais ba atividades kooperativa CPD-RDTL iha Sub Distritu fatuberlihu ne’ebe sai problematiku durante ne’e. Maijen Lere informa ninia hanoin ida ne’e ba PM xanana iha Palcio Governu (31/1). 

“Governu tenki toma desizaun lalais, tanba agora forca halo hela ezerisiu iha ne’eba, ami hakarak apoiu desizaun governu nian,” dehan Lere, hafoin enkontru xanana iha Palacio Governu. Maijen Lere dehan tan katak, to’o oras ne’e governu seidauk hasai desizaun ba F-FDTL atu halo atuasaun maibe, ezersisiu F-FDTL iha fatuberliu sei prolonga to’o 15 Fevereiru maka remata. 

Nune’e, Lere mos husu atu desizaun neebe governu foti tenki tetu didiak tanba CPD-RDTL ne’ebe halo kooperativa iha Welaluhu ne’e ema Timor oan. 

“CPD-RDTL ne’e ita nia ema, laos ema seluk ", dehan Lere. Lere mos hatutan tan, F-FDTL pronto apoiu Governu hodi hasai CPD-RDTL iha ne’eba maibe importante mos governu tenki kria kondisaun ba sira mos iha servisu" . 

“Estadu tenki kria kondisaun para sira (CPD) labele lao tun lao sa’e,” dehan nia. Lere hatutan, agora koperativa CPD-RDTL lao ona, se governu hapara se mak sei haree Natar ne’ebe mak sira halo ona ne’e. 

“Haree sira nia natar sira ne’eba atu husik ka, semak atu okupa, ida ne’e mak orincipal,” dehan lere. Entertantu, Lere dehan, Primeiru Ministru Xanana Gusmao nudar Ministru Defeza Siguransa hatete, governu estuda hela molok hasai desizaun klaru hodi haara atividade CPD-RDTL.

.