“Lere Husu Labele Abandona Eis Titulares”

.

Jornal Timor Post - Segunda-feira, 04 Fevereiru 2013 

Major Jeneral FALINTIL-Forsa Defeza Timor Leste (F-FDTL), Lere Anan Timur husu ba Estadu no Governu Timor Leste atu kontinua fo fiar ba esi titulares sira wainhira sira remata ona sira nia mandatu servisu hodi nune’e sira bele kontinua servisu ba nasaun ne’e. 

 “Hau husu ba Governu tenki hanoin ona ba futuru atu fo mos servisu todan oituan ba sira, tanba, se ita la aproveita sira, ita maka sei lakon sira,” dehan Lere ba Diariu Timor Post, sabadu (02/2) iha Kuartel jeneral F-FDTL Fatuhada, Dili. 

Lere hato’o lia hirak ne’e, relasiona ho eis titulares balun hanesan eis Prezidenti Republika Jose Ramos Horta ne’ebe husik hela Timor Leste hodi ba servisu iha ONU, ne’ebe tuir loloos Governu bele aproveita nia matenek hodi kontribui nafatin ba dezenvolvimentu nasaun ne’e. 

Koalia kona ba diferensia partidu, Lere realsa, ne’e demokrasia, maibe ba jerasaun foun sira tenki konsidera sis titulares sira. 

“Ita kuandu sadere metin ba sira, ita sei halo buat hotu, ne’e izemplu hanesan moris iha familia ida, kuandu laiha inan no aman ita oan sira sei hasoru problema boot,” Lere hateten. 

Ne’eduni, tuir Lere, ita tenki konsidera sira tanba sira mak fo forsa ba ita sai mestri no profesores ba ita. Entertantu, eis Primeiru Ministru Mari Alkatiri realsa katak, nia rasik la konsidera an hanesan reformadu maiske hetan ona titulares. 

“Se ita presiza duni liderasan ho kapasidade atu mibiliza ema ba kombate pobreza, ital abele halo eis titulares sira sai reformadu,” katuir Lere. Iha fatin seluk, Eis Primeiru Ministru Mari Alkatiri hateten, vizaun Politika husi Primeiru Governu Konstitusional la hateke ba pensaun ne’ebe maka oferse ba veteranus hanesan parte social ida, maibe hanesan intensivu atu sir abele partisipa iha prosesu tomak dezenvolvimentu nian. 

“Pensaun veteranus hanesan intensivu ida para veteranus sir abele partisipa iha prosesu tomak dezenvolvimentu iha nasaun ida ne’e,” hateten Mari Alkatiri iha Kampus UNTL Liceu, Dili, Sabadu, (02/2). 

Tuir lider 75 ne’e katak, sistema ne’ebe Governu trasa ita konsidera katak, maximu pursentu 20 ema iha Dili mak hetan benefisiu no mos pursentu 5 iha nivel nasional mak hetan benefisiu, maibe realdiade pursentu 95 la hetan buat ida. 

Purtantu husi rejuktadu hirak ne’e maka Sekretariu Jeral Partidu FRETILIN ne’e konfesa sistema sira hanesan ne’e loloos presiza tempu naruk para atu kumpriende didiak, atu nune’e ital abele fakar osan arbiru deit. 

.