“Lamenta Lingua Iha G7+”

.

Jornal Timor Post - Sabadu, 16 Fevereiru 2013 

Reprezetante povu iha uma fukun Parlamentu Nasional (PN) husi bancada opozisaun FRETILIN no Bancada CNRT konsidera eskrita g7+ ne’ebe hakerek ho lian ingles kontra ona lian ofisial ne’ebe hakerek ona iha konstituisaun RDTL. 

“Hau hanoin g7+ ne’ebe hakerek ho lian ingles ne’e iha ita nia lei konstituisaun la hakerek lian ne’e,” deklara Depuatdu Josefa Pereira iha Plenaria PN ba debate espesialidade, sesta (15/2). 

Tanba ne’e, husu ba governu atu muda eskrita g7+ ne’ebe hakerek iha lian Ingles ba lian Portugues ou tetun par abele lao tuir duni lian ofisial neebe hakerek ona iha ita nia lei inan. 

Lamentasaun hanesan mos Prezidenti Komisaun B, ne’ebe trata asuntu negosiasaun Estranjeirus, Defeza no seguransa, Maria Lurdes Besa hateten, nia parte mos simu dokumentus balun tamba iha komisaun ne’ebe hakerek ho lian Ingles hotu. 

“Hau apelu ba ita hotu atu kurizi, karik sala laos mai husi ita, maibe mai husi instituisaun sleuk, para evita problema,” Tenik Bessa. Hatan ba konfuzaun ne’e, Primeiru Ministru Kay Rala Xanana Gusmao hateten, relasiona ho konfuzaun ne’e Governu sei hadia. 

“Deputada Josefa nia konfuzaun kona-ba Lingua ne’ebe hakerek iha g7+ ami sei haree, maibe hau hanoin atu hakerek ho lian Tetun difisil,” Xanana dehan. 

Xefi Governu esklarese tan katak, iha g7+ aprezenta iha ne’eba dala barak ho lian Franese depois tradus ho lian Ingles, maske nune’e Governu sei hadia. 

.