LABEH Husu Rejignasaun ba Ministra Emilia Pires

.

LABEH - Written by Zelia Correia - Wednesday, 13 February 

Lalenok Ba Ema Hotu – LABEH hanesan ONG Anti Korupsaun, Quarta feira ne'e (13/2) ofisialmente husu rejignasaun ba aktual Ministra Planu e Financas, Emilia Pires hafoin akuzasaun publiku konaba alegasaun korupsaun no abuzu de poder ne'ebe jornal investigativu Tempo Semanal fo sai iha loron 12 Febreiru 2013.

Liu husi Direitor Executivu LABEH, Julio Gil da Silva Guterres ejiji rejignasaun ne'e ba Ministra Emilia Pires atu iha korajen hodi promove transparencia no akuntabilidade.

“LABEH hakarak husu ba Ministra Emilia Pires atu rejigna an husi nia postu tamba involvimentu Ministra Financas iha prosesu fo tenderizasaun ba kompainia Mac's Metalcraft PTY LTD, hodi kompras  ekipamentus Hospital Nasional Guido Valadares (HNVG) hanesan abuzu de poder no konflitu de interese ida hanesan pesoal xavi iha governu nian”. Gil da Silva hateten.

“LABEH lakohi ona halo esplikasaun no hatudu faktus tamba publiku akompanya ona publikasaun media konaba prosesu fo tenderezisaun ba Ministra nia an rasik, maske na'in husi kompainia ne'e nia kaben Waren Macleod nian, maibe konsidera mos hanesan Ministra nia kompania rasik, tamba ne'e projeitu ne'e nakonu ho konflitu de intrese no violasaun ba lei aprovizionamentu nian, publikasaun media nian ne'e hatudu momos ona katak Ministra Emilia Pires laiha komitmentu ba promove boa governasaun, transparencia no akuntabilidade iha nasaun ne'e” hatutan Eis Direitor Centru Jornalista Investigativu Timor Leste (CJITL).

LABEH mos ejiji ba Komisaun Anti Korupsaun (KAK) atu imediatemente haruka karta ba Primeiru Ministru atu halo demisaun urjente ba Ministra Financas hodi bele KAK loke ho seriedade prosesu investigasaun profundo ida hasoru Ministra Emilia Pires.

“Husu ba KAK atu labele atrazadu hela deit, faktus fo sai hotu ona, husu KAK atu halo karta pedidu ida ba Primeiru Ministru hodi husu demisaun ba Ministra Financas hodi mai hatan konaba alegasaun korupsaun ne'ebe hamoe tebes dignidade estado nian” Gil da Silva ejiji.

“Ministra Emilia Pires mos lidera grupo G7 +, semana oin sei iha konferensia internasional ida iha Dili, no Ministra Emilia sei tur iha meja ulun atu koalia ba partisipantes sira mai husi nasaun oin oin konaba transparencia no akuntabilidade, oinsa Ministra ba tur iha ne'eba bainhira nasaun kestiona hela dignidade Sra. Ministra nian hanesan Membru Governu Xavi ba promove boa governasaun iha nasaun ne'e” Direitor Executivo LABEH ne'e remata. (LABEH)

.