“Kazu Emilia Pires Ne’e Seriu”

.

Jornal Timor Post - Tersa-Feira, 12 Fevereiru 2013 

Kazu Ministra Finansas Emilia Pires ne’ebe deskonfia fo tender ba nia kaben hodi sosa ekipamentus Hospital Nasional Guido Valadares, hafanun reprejetante povu sira hodi halo fiskalizasaun. Inisiu Fiskalizasaun husi Komisaun F Parlamentu Nasional ne’ebe trata asuntu saude, edukasaun, kultura, veteranus I igualidade de jenerru mosu erru. 

“Ami halo ona fiskalizasaun ba projeitu ne’e no ami nota katak, ekipamentu ne’ebe mak sosa menus husi osan ne’ebe maka sira propoin, ne’e duni material sira ne’e la tuir BOQ,” deputada Ulda Maria da Concecao membru husi bancada FRETILIN ba jornalista sira iha uma fukun PN, segunda (11/2). 

Maibe, deputada ne’e mos lakohi fo nia komentariu barak atnba kazu ne’e sensitive, ne’e duni nia sujere atu halo fiskalizasaun klean liu tan para hatene detallus kona-ba erro ne’ebe maka mosu. Iha fatin ahnesan, Prezidenti komisaun F Virgilio Hornai hateten, oras ne’e, nia rasik seidauk hetan informasaun konaba ekipamentu ne’ebe mak sosa ba Ministeriu Saude la tuir ninia espesifikasaun.

Nia dehan, kuandu mosu buat ruma maka hateten, projeitu ne’e la tuir ninia espesifikasaun no iha indikasaun halo mal administrasaun hodi la tuir prosesu legais aprovizionamentu nian no iha indikasaun prejudika orsamentu estadu nian ba interese privadu, sei buka atu hatene. 

“Hau hanoin projeitu ne’e maka indika duni ema ruma halo ona mal administrasaun, ita prosesu kodiku penal ba responsablidade kriminal sira, atu prosesa kazu ne’e,” Hornai Hateten. 

Iha Sikun seluk, fontes konfirmadu ne’ebe lakohi hateten ninia naran informa, kazu Ministra Emilia Pires nian ne’e seriu, nia mos dehan, pronto atu sai sasin bainhira kazu ne’e to’o iha Tribunal. 

Fontes ne’e mos konfesa katak, durante ne’e nia laiha poder atu hatene kona-ba prosesu asina projeitu ho osan bo’ot, tanba Ministra Emilia la fo poder ba nia atu hatene kona ba projeitu sira ne’e. 

“Durante ne’e hau servisu, maibe laiha poder kona-ba projeitu sira ne’e, buat hotu Ministra hatene ho Diretores sira, hau la asina nein projeitu ida, se karik mak hau iha poder, projeitu sira hanesan nee hau sei trava,” fontes importante ne’e hatutan. 

.