Karta Aberta ba Primeiru Ministru RDTL, Kay Rala Xanana Gusmao

.

Karta Aberta ba Primeiru Ministru RDTL, Kay Rala Xanana Gusmao - Dili, 15/2/2013 

Assunto: Hadian Mekanismu Administrasaun ba Ro'o Nakroma.

Excelensia, 

Liu husi karta ida ne’e hau hato’o hau nia saudasoes no kumprementus ba ita bot nudar Primeiro Ministro RDTL. Hau hakerek ho hau nia naran rasik Arsenio Bano, nudar sidadaun Timor-Leste nebe mai husi Distritu Oekuse-Ambeno. Ho respeitu hau hein ita bot bele rona no hare preukupasaun nebe hau observa akontese dadauk ba ita nia populasaun ba mai husi Oekuse-Dili-Oekuse. 

Hanesan karik ita bot hatene katak iha loron Segunda Feira no Kinta Feira semana-semana ita nia passaeirus sira sei sae ro’o Nakroma ba mai Oekuse. Iha loron seluk Semana-Semana (Tersa Feira no Sexta Feira) passajeirus husi Oekuse sae ro’o Nakroma mai Dili. 

Hau hakarak hato’o hau nia tristeza ba tratamentu no kondisaun nebe mak ita nia passajeirus maiyoria povo husi Oekuse enfrenta semana semana wainhira sira sa’e ro’o Nakroma atu ba Oekuse husi Dili ka husi Oekuse mai Dili. Dalabarak ita liu iha HOTEL Timor nia oin ita triste hare ita nia povo barak hamrik iha Estrada dudu malu atu bele konsege tama ba portu hodi sae ro’o Nakroman ba Oekuse. Situasaun nee akontese bebeik ona no dalabarak mosu fuan lia fuan insultus ba malu entre pasajeirus ka entre offisiais sira serbisu iha Porto ho passajeirus sira. 

Kondisaun ne’e akontese hamosu tratamentu injustu ba passajeirus Oekuse sira, simplemente karik kondisaun portu laiha ba passajeirus ou jestaun no karik falta treinamentu ba sira nebe mak serbisu hodi Administra ro’o Nakroma. Hau mos observa katak sedauk iha mekanismu diak atu fa’an bilhete (tiket) ba passajeirus sira. Tiket fa'an ho injustu dala barak folin tiket sai as liu folin nebe mak Governu determina tiha ona. Situasaun mekanismu fa’an tiket halo passajeirus barak sai susar liu tan, tan sira laiha kbit naton atu sosa tiket nebe mak liu husi folin nebe mak Governu determina ona tuir classe iha ro’o Nakroma. 

Excelensia, 

Ikus liu, hau hakarak hato’o ba ita bot katak hau mos simu informasaun hateten tinan tolu ona ro’o Nakroma sedauk hetan manutensaun regular. Se informasaun ne’e los duni, hau so espera deit katak sei laiha azar ruma ba ro’o Nakroma wainhira tula passajeirus mai Oekuse-Dili-Oekuse. Hau hein katak Governu se halo manutensaun ba ro’o Nakroma iha tempu badak hodi prevene problemas nebe ema hotu la espera. Hau hanoin diak liu Governu TL sosa tan ro’o ida hodi bele serbe nudar ro’o pasajerius Oekuse-Dili-Oekuse no serbi mos ba Atauro. Ho karta ida ne’e hein katak ita bot sei enkoraja Ministeriu nebe kompete ba areas transportes e komunikasaun hodi bele resolve kondisaun nebe hau hato’o iha leten. 

Obrigado wain ba ita bot nia atensaun
Arsenio Bano Sidadaun Timor-Leste mai husi Oekuse-Ambeno
.