“Horta: Atentadu 11 Fevereiru Hakotu Violensia TL”

.

Jornal Timor Post - Kuarta-Feira, 13 Fevereiru 2013 

Eis Prezidenti Republika Timor Leste, Jose Ramos Horta deklara, sakrifisiu boot ne’ebe nia hetan iha atentadu 11 Fevereiru 2008 hakotu violensia iha Timor Leste. 

“Se sakrifisiu boot ne’ebe ha’u atu selu ne’e ho folin katak, vale ba iha sentidu ne’ebe mak iha momentu ne’eba (11 Fevereiru) duni mak notisia ne’e halo mundu tomak hatene, no iha Timor Leste laran tomak, katak hau hetan kanek, Violensia ne’e to’o agora la akontese tan,” afirma Jose Ramos Horta. 

Iha 11 Fevereiru 2008, Jose Ramos Horta hetan ataka iha nia uma oin ho tiru kilat musan dala rua, huti tiru ne’e kona ninia estomagu, Atake ne’e lidera husi Maijor Alfredo Reinado, ne’ebe mate kedas iha atentadu ne’e. 

“Se ho folin ida ne’e mak hau tenke selu, atu nune’e bele hakoru violensia iha pais, ka ida ne’e mak maromak ninia vontade, katak ema balun tenke selu no ida ne’e mak akontese duni ba prezidenti Republika rasik, obviamente hau simu no lai rai odiu, no hau fo perdua ema sira neebe hakanek ona hau,” akresenta eis Prezidenti liu husi ajensia Lusa ne’ebe mak asesu husi Timor Post (12/2). 

Jose Ramos Horta relembra, buat hotu bele remata wainhira entrega ba autoridade sira, no hau entrega an fila fali hodi servi povu no nasaun Timor Leste. 

Entertantu, elementu sira ne’ebe envolve iha atake ne’e maka julga ona no kondena iha 2009, maibe tanba sira simu indultu husi eis Prezidenti Jose Ramos Horta, atual reprejetante husi Sekretariu Jeral ONU ba Guine-Bissau. 

 “Sira kumpri kastigu ruma iha prizaun no hau hanesan Prezidenti da Republika, iha momentu ne’eba, komprende situasaun husi ita nia istoria, hanesan buat sira ne’ebe akontese, halo todan buat hotu, hau desidi atu fo indultu ba sira, perdua sira,” nia hateten. 

Nune’e, iha inisiu fulan janeiru, Jose Ramos Horta, nomea hanesan reprejetante Sekretariu Jeral ONU nian iha Guine Bissau, Pais Africa Ocidental hodi hametin paz iha rai neeba.

,