Halo Natar Ho Liman “CPD-RDTL Konsege Hamoe Governu”

.

Jornal Nacional Diario - Kuarta-Feira, 13 Fevereiru 2013 

Vice Prezidenti bancada FRETILIN, iha parlamentu Nasional, Francisco Miranda Branco, afirma, Grupo Concellu Popular Defeza-REpublika Demokratika Timor-Leste (CPD-RDTL) konsege halo moe Governu, liu-liu Ministeriu Agrikultura no Pescas (MAP) tanba halo natar hectares ga hectares ho deit sistema tradisional ka uza deit liman. 

Grupu CPD-RDTL sira halo natar hectares lubuk ida ho liman tanan ne’e iha Sub Distritu Fatuberlihu, Distritu manufahi. 

“Ida ne’e haesan pukulan (tuku) bo’ot ida ba Governu liu-liu MAP, tanba Ministeriu ne’e Governu gasta osan milloens ba miloens atu sosa traktor, maibe la produs buat ida, no Grupu CPD-RDTL sira halo fali natar lubuk ida ona,” dehan Francisco Branco ba JNDiario, Tersa (12/2) iha Parlamentu Nasional. 

Tuir nia, CPD-RDTL sira nia hanoin ne’e diak tebe-tebes ba harii koperativa, tanba koperativa ne’e seitor ekonomia ida ne’ebe diak ba povu Timor Leste, maibe sira ba kokupa fali ema nia rain ne’e mak lalos, maski nune’e sira nia inisiativa ne’e diak. Iha fatin hanesan, deputadu Cesar valente de Jesus, husi Bancada CNRT, husu ba grupu CPD-RDTL atu kumpri lei ne’ebe vigora iha estadu RDTL ne’e. 

“Bainhira ema ida moris iha estadu ida hanesan sidadaun, maibe sidadaun ne’e rasik larekunese lei entaun susar atu moris hanesan sidadaun, Parlamentu Nasional mos preokupa atu organizasaun ne’e bele sai legal, atu nune’e sira mos bele moris iha ambiente ne’ebe demokrasia,” tenik Cesar Valente. Prezensa CPD-RDTL iha Welaluhu halo populasaun sira iha Sub Distritu ne’e, peokupa tebes tanba lor-loron sira halo movimentu ba mai ho buat kroat. 

“Ba ha’u, se sira Timor oan, sira tenki kontribui ba Timor ninia diak, labele kontribui fali hodi ba halo fali servisu ba ema seluk ninia interese,” dehan Cesar Valente. 

Ba preokupasaun ne’e, Jornalista tenta atu halo konfirmasaun ho Ministru Agrikultura no Pescas, Mariano Asanami sabino kona ba kontiudu husi koperativa ne’ebe CPD-RDTL sira halo, maibe nia la iha fatin. Entertantu, Prezidenti Komisaun B Parlamentu ne’ebe trata asuntu Defeza, Seguransa no Relasoens Externa, Maria Lourdez Bessa, husu ba Ministru Defesa no Seguransa Kay Rala Xanana Gusmao atu rezolve lalais ona problema ne’ebe CPD-RDTL halo hodi ba okupa rai iha Sub Distritu fatuberlihu, Distritu manufahi ho tipu dialogu. 

Tuir Prezidenti Komisaun B ne’e katak, CPD-RDTL ba okupa rai iha fatin ne’eba hodi halo Natar, laiha konesementu legal husi autoridade lokal. 

 “Fo-foun ami husu labele husik naruk tanba populasaun iha ne’eba mos iha sira nia direitu ne’ebe maka afeitadu, pronto prosesu lao neineik hotu-hotu buka para atu rezolve liu husi dialogu para evita konflitu, ida ne’e mos ami louva, ami aseita, maibe fila matan ba sorin tenki asiste para rezolve no ida-idak tenki fila ba sira nia hela fatin,” tenik Maria. 

.