Governu Husu CPD-RDTL Fila Ba Ida-Idak Nia Distritu “Lere Anan Timur: Kilat Atu Oho Ema NO Defende Soberania La’os Atu Infeita”

.

Notisia Husi TVTL - Kinta-Kalan, 07 Fevereiru 2013 

Governu foti ona desizaun ba CPD-RDTL iha sub Distritu Fatuberlihu, Maijor jeneral Lere Anan Timur lori mensazen husi Xefe do Governu Kay Rala Xanana Gusmao atu ema ida-idak fila ba nia Distritu. 

Mensazen husi Primeiru Ministru Kay Rala xanana Gusmao ba massa CPD-RDTL ne’ebe oras ne’e okupa rai komunidade nia iha Sub Distritu fatuberlihu atu sira ida-idak fila ba sira nia knua. 

Mensazen ne’e hato’o liu husi komandante F-FDTL Maior Jeneral Lere Anan Timur ne’ebe Kuarta feira ne’e hakat to’o CPD-RDTL sira nia fatin iha Fatuberlihu. Lere Anan Timur husu ba membru CPD-RDTL hotu-hotu ne’ebe halo servisu komunal iha fatin ida ne’e atu ida-idak fila ona ba sira nia Distritus.

“Maluk sira hanesan hau dehan, hau la mai koalia politik ho imi (CPD-RDTL), iha ne’e to’os e iha ne’e natar, ita mai koalia to’os no natar nian, ne’e mak hau husu ba imi, hau mai mak ne’e, ita nia maun Primeiru Ministru nuudar mos Ministru defeza, Xanana ninia hanoin mak ne’e, imi fila ba imi nia Distritu governu responsabliza para imi organiza imi nia aan, ne’e maka hau husu ba imi, hau hanoin katak imi kumpriende katak, ita harii nasaun laos halimar, ita harii ho ran, ho isin, bandeira ne’ebe imi kaer, ne’e reprejenta ita nia nasaun, reprejenta ita nia estadu, hau lori ita nia maun boot Primeiru Ministru ninia lia menon, ba hateten ita nia alin siraiha ne’eba para ida-idak fila ba ninia distritu, organiza an atu governu bele apoia,” dehan Lere Anan Timur. 

Maske nune’e, liu husi komisaun organizadora CPD-RDTL iha nia diskursu hateten, rai Transa SP1, SP2 no SP3 ne’e propriedade estadu nian, tamba ne’e sira iha direitu atu halo natar hodi hadia ekonomia Povu Timor Leste. 

“Tamba rai ne’ebe agora dadaun ami halo hanesan kooperativa, ne’e rai propriedade estadu nian, uluk estadu Indonesia nia, transmigrasaun, SP1, Sp2, no SP3, ema balun dehan ami halo okupasaun illegal maibe ne’e laloos, ami mai hanesan halo aproveitamentu laos halo fali okupasaun illegal nian, ne’e laloos, iha koinesementu ba Prezidenti da Republika, koinesementu ba Primeiru Ministru no mos iha konesementu ba senor Lere Anan Timur, ne’ebe rai ida ne’e ami sei la lori fila baa mi nia rai, maibe ami halo ida ne’e tamba ita nia estadu dependenti demais liu ba iha rai seluk konaba ita nia ekonomia nasional nian,” dehan Prota Vos CPD-RDTL. 

Iha fatin hanesan, Maijor Jeneral Lere Anan Timur hateten, Prezidenti da Republika Taur Matan Ruak aseita ho programa CPD-RDTL ne’e, maibe laos atu ba okupa ema nia rai. 

“Halo to’os natar iha ne’e mais imi dehan Prezidenti apoiu, lae, Prezidenti apoiu para imi halo natar laos mai okupa rai, ne’e Prezidenti koalia bah au, dehan bele halo natar, halo to’os, ne’e Prezidenti apoiu 100% e hau mos apoia, mais imi halo hanesan halo fali problema ne’e Prezidenti la apoia, i ami veteranus hotu-hotu, imi kuandu organizadu tuir ita nia prinsipiu, tuir ita nia konstituisaun ami apoia 100%, i edtadu ne’e estadu alin sira, imi labele halimar ho estadu, estadu ne’e iha buat hotu-hotu, prujemplu imi nia maluk sira (F-FDTL) ne’ebe kaer kilat iha ne’eba ne’e laos atu infeta an, infeta an karik lakohi para estadu gasta osan, ne’ebe ne’e atu oho ema, ida kaer metan neebe ne’e atu defende ita nia soberania, soberania ne’e ema rai seluk mos bele estraga ita nia soberania i ate ita rain ain mos bele estraga ita nia soberania, tamba ida ne’e maka Governu sosa kilat ne’e, forma forsa ne’e, mais kuandu halo infeita deit karik lalika sosa,” deklara tan Lere Anan Timur. 

Ho hakraik an, husu ba membrus organizasaun CPD-RDTL ne’ebe oras ne’e sei iha fatin ida ne’e atu kumpri orden ne’ebe hato’o husi Xefe do Governu hodi labele hamosu problemas. Oras ne’e dadaun organizasaun CPD-RDTL ne’e sira komesa ona halo natar ektares 12 ne’ebe tuir planu sei halo to’o ektares 200 resin. 

.