Fasilidade Saude Sei Menus, Ukun Nain Labele Uza Povu Sai Objeitu

,

SUARA TIMOR LOROSAE - Tersa, 12 Fevereiru 2013 

DILI- Relasiona ho Fasilidade Iha Hospital Nasional Guidu Valaderes nebe mak menus, liu-liu ran ba pasiente sira nebe presiza, kama no mos fasilidade seluk, primeira dama Isabel Ferreira husu ukun nain sira labele uza povu sai objeitu iha debate orsamentu no mos iha tempu kampaina, tamba povu barak mate iha hospital wanhira atu hetan tratamentu saude. 

Primeira Dama Isabel Ferreira fo sai deklarasaun ne’e hafoin vizita hospital Nasional Guidu Valadares hodi hare fasilidade hospital Nasional liu-liu iha sentru ran, no mos fasilidade sira seluk iha hospital nasional ne’e. 

“Povu mai iha hospital ho mehi atu kura moras, maibe realidade povu mai hospital laos atu salva, barak mai mak mate, ita seidauk rona husi saude sira seluk, ne’e triste teb-tebes ba ita, ita nia ukun nain sira osan iha, ita koalia orsamentu hotu-hotu temi povu nia naran mas povu terus no mate nafatin ba problema saude maibe ukun nain sira diak hela,” dehan Isabel. 

Primeira Dama ne’e hatete mos katak, ukun nain sira kuandu debate sempre temi povu nia naran, mas povu terus nafatin no mate bei-beik maibe ukun nain sira diak hela, tamba moris iha uma diak, sae kareta luxu, ukun nain sira moras hetan atendementu nebe lais, diak liu labele temi povu nia naran. Timotio Gusmão/Lucas da Costa 

.