Estatutu CPD-RDTL Difinitivu

.

Diariu Timor Post - 6 Fevereiro 2013

DILI-Xefi Konsellu Popular Demokratika-Republika Demokratika de Timor Leste (CPD-RDTL), Antonio "Aitahan Matak" konsidera estatutu CPD-RDTL ne'e difinitivu. 

“Ha’u hakarak hateten de’it katak estatutu CPD-RDTL ne’e difinidu, tanba CPD-RDTL manifesta polítiku manuál polítika anteriór 74 no iha bandeira organizasaun rasik,” Matak ba Timor Post iha sede CPD-RDTL, Balide, Díli, Tersa (5/2), relasiona ho esteitmentu Bispu Dioseze Baucau Don Basílio do Nascimento ne’ebé preokupa estatutu CPD-RDTL. 

Tuir nia, Amu Basílio nia esteitmentu ne’e hanesan lian murak ida atu oinsá bele refórsa liu-tan organizasaun CPD-RDTL. 

Tanba ne’e, nia fó parabens ba Amu Basílio. Matak esplika, estatutu CPD ne’e difinitivu tanba bazeia ba Konstituisaun RDTL 1975 katak Repúblika Demokrátika de Timor Leste ne’ebé FRETILIN proklama ne’ebé disidi katak ekonomia tenke mai husi agríkula. 

Tanba ne’e mak organizasaun CPD-RDTL tenke halo tuir oinsá bele fórma grupu hodi kaer rasik hodi nune’e labele tane liman bebeik ba nasaun sira seluk. 

“Tanba ne’e maka iha ami nia estatutu ne’e ami esplika ami nia án katak ami halo tuir ukun fuan lei 1975 nian. Ne’e maka ami ba prátika no tuir duni ami nia prinsípiu hanesan mós Amu Bispu hatete katak sé karik Amu Bispu mak fasparte iha governu hodi ukun karik Amu Bispu bele fó apoiu ba organizasaun CPD-RDTL,” Matak haktuir. 

Tanba ne’e, nia husu ba Públiku li-liu povu Timor laran tomak atu labele tauk no hakfódak ho organizasaun CPD-RDTL nian, tanba organizasaun CPD-RDTL hamriik la’os atu destroi nasaun maibé hakarak mantein pozisaun hodi defende estadu no governu atu nune’e bele dezenvolve ekonomia iha nasaun TL iha futuru. 

Nune’e mós, nia hatutan, intensaun husi CPD-RDTL hakarak halo loos no halo tuir istória hodi nune’e bele servi nasaun TL ho di’ak ba jerasaun fóun iha futuru. Aleinde ne’e hakarak kria justisa ekonomia ida fórte ho baze de fundamentál atu nune’e labele mósu krizi ekonomia iha rai laran. 

“Tanba ne’e mak ami hakarak halo to’os ho natar iha Welaluhu. To’os ho natar ne’ebé ami halo iha ne’ebá la signifika atu ba hadau ema ida nia diretu ka grupu ida nia diretu. Buat ne’ebé ami halo tanba bazeia ba nasionalizmu ida ne’ebé maka maun Xanana rasik hanorin ba ami,” Matak dehan. (cos)

.