“Eis DJ HNGV Konsidera Desizaun MS Injustisa”

.

Foto, Tempo Semanal - Odete Silva Viegas

Jornal Independente - Tersa-Feira, 12 Fevereiru 2013 

Eis Diretor Jeral Hospital Nasional Guido Valadares (HNGV), Odete da Silva Viegas hateten, desizaun Ministru saude hodi troka nia husi kargu ne’e mal-konsiderasaun no injustica, tamba laiha karta konesementu antes. 

Doutora Dermatologist Odete ne’e konsidera Ministru saude uza Poder hodi troka nia ho Administrador oha HNGV sem karta konesementu antes ba nia, atu nune’e nia mos bele prepara dadus ruma hodi bele halo hand over. 

“Ami laiha informasaun antes, informasaun ne’ebe maka verbal husi Ministru bolu hau iha kinta-feira, bolu hau dehan katak aban ne’e sei publika ona naran sira ne’e atu troka ona ita boot, altura ne’e mos hau hakfodak, ne’e keadaan ne’ebe mendadak, tamba aban troka hoin hau foin hatene,” dehan Odete. 

Tuir nia katak, desizaun ne’e la justu tanba laiha karta legal nuudar karta konsiderasaun, la’os dehan nia, MS uza nia poder hodi troka ema seluk tuir nia hakarak. 

“Hau laos halo krimi ruma mak troka, hau ho modelu ida hanesan ne’e duni sai deit depois tau fali ema seluk, ne’e lalos, tenki liu husi dalan legal ida, tanba hau uluk tama mos liu husi nomeasaun ida,” dehan odete. 

Entertantu, Ministru Saude Sergio Lobo hatete, antes ne’e nia informa ona ba eis DJ HNGV sei halo reforma hodi troka nia (Odete) tau fali DJ foun. 

“Hau esplika tiha ona ba nia katak, iha nomeasaun foun iha diretora foun maka atu troka nia hau husu mos nia atu ajuda DJ foun ne’e, durante semana rua nia laran depois maka tama ba Hand Over nian,” hateten Sergio ba Jornalista hodi responde preokupasaun DJ tuan, segunda (11/2), iha PN. 

Diretor foun ne’e, antes ne’e assume kargu nuudar Diretor SAMES, nune’e mos, maske Diretor foun ne’e uluk mos Kaer SAMES no mosu problema barak iha SAMES, maibe MS garantia katak sei halo mudansa iha HNGV.

.