Dr. Mari Alkatiri: “Tatiku Istoria Dada Ema Hotu Atu Hateke Ba Oin Hodi Dezenvolve TL”

.

Notisia Husi TVTL - Kinta-Kalan, 31 Janeiru 2013 

Dr. Mari Alkatiri hateten, Timor oan labele orgullu ba buat ne’ebe maka pasa iha tempu liu ba, mais tenki haree difisil ne’ebe mai. 

Mari Alkatiri hateten kestaun ne’e, wainhira partisipa iha seminariu ne’ebe organiza husi UNTL. Seminariu ho tema Timor oan labele orgullu de’it buat ne’ebe halo tiha ona iha pasadu mais presiza dezafius saida mak nasaun ne’e sei hasoru hodi dezenvolve iha futuru. 

“Laos tamba ita halo luta iha tempu pasadu, ema hotu, familia hotu-hotu, ita hotu orgullu ba ita nia luta, mais ita tenki kontinua hateke ba oin, dezafiu boot ba ami (jerasaun tuan) ne’ebe hahu prosesu ida ne’e atu hatudu dalan para hatutan beibeik, liu-liu ba jerasaun foun halo nusa mak atu hateke ba oin, ne’e mak ita nia luta loloos, la’os tamba ami ne’ebe halo istoria, ami uza istoriku tatiku ne’e para dada ema hotu atu hateke ba futuru hodi lori nasaun ne’e ba moris diak, ne’e mak ita nia luta loloos,” haklaken Mari Alkatiri. 

Entertantu komandante Jeral FALINTIL-Forsa Defeza Timor Leste (F-FDTL), Lere Anan Timur hateten katak, atu Timor Leste sai nasaun ida ne’ebe dezenvolvidu no forte, liu-liu Joventude sira maka tenki hatudu dalan hodi dezenvolve Timor Leste. 

“Nasaun nia vida, nasaun nia moris diak, intrega ba jerasaun foun sira,” dehan Lere. Haree ba esperensia iha tinan kotuk, membru F-FDTL barak maka mate tamba problema ho ema civil. 

Lere Anan Timur mos husu ba Joven sira atu respeita membrus F-FDTL hanesan kolega no maun alin e labele haree malu hanesan inimigu. 

,