Dr. Mari Alkatiri: “Lucia Lobato Loke Dalan Ba Justica, Ministru Tauk No Hein Malu Asina Kontratu”

.

Jornal Timor Post - Sesta-Feira, 01 Fevereiru 2013 

Sekretariu Jeral Partidu FRETILIN, Dr. Mari Alkatiri hateten, Eis Ministra Justica Lucia Lobato loke ona dalan, ne’eduni halo membru governu sira tauk atu asina dokumentus. 

“Agora dadaun ita nia alin, ita nia biin, no ita nia irman Lucia loke dalan ona, ne’eduni, halo membru governu sira tauk atu asina dokumentus, maibe, sira dudu hotu ba Primeiru Ministru Kay Rala Xanana Gusmao mak sei asina,” Mari dehan ba Timor Post iha Universidade Nasional Timor Lorosa’e (UNTL), Kinta (31/1). 

Tuir nia katak, loloos hahalok hanesan ne’e (asina dokumentus) labele akontese, nuudar membru governu, tuir nia, tenki iha responsablidade ba pasta ne’ebe sira assume. 

“Se ida ne’e mak akontese duni sei fo impaktu negativu ba governasaun V Governu, ne’e duni ema hotu sei hein malu,” Alkatiri hateten. 

Nia haktuir, husi akontesementu sira ne’e maka iha ezekusaun orsamentu 2012 iha pursentu 50, pursentu 100 ba rekorenti no pursentu 40 resin ba despeza dezenvolvimentu. 

“Hau tur ho Ministru balun, sira hateten mai hau depois kazu Lucia nian sira atu asina de’it dokumentu ida mos tauk tebetebes,” Alkatiri konfesa. 

Maibe, lider rejistensia ne’e katak, kuandu Ministru sira maka tauk ona atu hala’o sira nia funsaun ho diak, ne’e hatudu ona katak, sei mosu impaktu negativu tanba hotu-hotu sei hein malu. 

 ,