Dr. Mari Alkatiri “Laiha Ema Ida Selok Xanana”

.

Jornal Timor Post - Sesta-Feira, 08 Fevereiru 2013 

Sekretariu Jeral FRETILIN, Mari Bin Amude Alkatiri afirma, enkuantu nia sei moris hela, nia lakohi haree ema ida seluk Xanana. 

“Ami nain rua belun diak, loos duni ema barak dehan iha palku politiku ami nain rua hakilar malu, maibe ami nain rua belun nafatin,” hateten Alkatiri iha nia intervensaun iha debate Orsamentu Jeral Estadu (OJE) 2013, iha uma fukun Parlamentu Nasional foin lalais. 

Alkatiri mos rekonese katak, nu’udar lider karismatiku ida ne’ebe konsege kontinua funu ba libertasaun Nasional to’o rohan, no agora fokus atu hadiak povu no nasaun sai diak liu. “Hau konkorda se ema barak dehan ami rua ne’e belun diak,” hateten Alkatiri. 

Iha fatin hanesan, Deputadu husi Bancada FRETILIN, Eladio Faculto hatutan, nia preokupa tebes ho kondisaun Xanana Gusmao nian ne’ebe kuaze membrus Governu barab aproveita atu hamonu nia ba rai kuak. “Se ita hanoin hakarak atu salva gurda nasaun ida ne’e no kredibilidade ita nia lideransa sira nian, ital abele aprende na’ok povu nia osan hodi dudu Xanana ba rai kuak,” afirma Aledio. 

Tuir nia labele iha oin temi maun Xanana, maibe iha kotuk halimar hela buat fo’er hodi hamonu maun Xanana. 

“Ha’u hakfodak de’it to’o oras ne’e primeiru Ministru nia uma rasik sei dauk iha, nia sei hela iha uma estadu, maibe Ministru, Sekretariu Estadu no Diretores barak mak iha ona uma rasik no balun iha tan rai liur, ida ne’e problemas seriu, laos halimar tanba, ne’e povu nia osan,” hateten Eladio.

.