Don Basilio: “Kazu Korupsaun Foin Haree Oin Feto Maibe Oin Mane Seidauk”

,

Notisia Husi TVTL - Kinta-Kalan, 31 Janeiru 2013 

Don Basilio do Nascimento kontinua dezafia autoridades judisarius atu prosesa ema ne’ebe deskonfia envolve iha kazu korupsaun. 

Lia hirak ne’e hato’o husi Bispo Dioseze Baucau Don Basilio do Nascimento, wainhira simu Vizita do trabalho husi Sekretariu do Estadu Politika Formasaun Profesional e Empregu Elidio Ximenes ho nia komitiva ba Distritu Baucau. 

“Hanesan ejemplu hodi dehan katak, ema hotu-hotu iha lei nia okos, ida ne’e buat diak ida, agora se hau bele halimar oituan, to’o oras ne’e korupsaun hatudu de’it oin feto, hau hanoin korupsaun la’o oin feto de’it, oin mane mos iha, maibe to’o ohin loron hau seidauk hetan oin mane nian, ne’ebe hein katak, buat ne’e atu sai loos ne’e, korupsaun oin feto hatudu ona, ita hein katak korupsaun oin mane nian mos bele hatudu hotu, esperansa iha beibeik maibe buat ida korupsaun ne’e hau hatene katak susar tebetebes atu halakon, buat ida korupsaun ne’e ita la haree, halo oinsa-oinsa ita la haree, ita haree mak konsekuensia korupsaun nian, ne’e duni atu hare buat ida korupsaun ne’e iha provas susar tebe-tebes, maibe se husu dehan hau iha esperansa? 

Hau hanoin ita mos hahu dadaun, ne’e duni buat hirak ne’e lao ba oin mak sei hadia diak liu tan, ofisial justica sira mos presiza treinu, presiza haklean tan sira nia konesementu, prsiza mos esperensia, ne’e duni hau hein katak ita sei to’o fatin, maibe ita mos tenki simu katak, ita la’o neineik tamba ita nia kuadru mos la barak,” dehan Don Basilio. 

Maske ho limitasaun rekursu humanu atu prosesa entidade ne’ebe deskonfia envolve iha kazu korupsaun iha Timor Leste maibe kontinua dezafia servisu autoridades judicial nian.

.