“Dom Basilio Dezafia Media Hatudu Provas Forti Hasoru Ministra Emilia”

,

Jornal Independente - Kinta-Feira, 14 Fevereiru 2013 

Bispo Dioseze Baucau, Dom Basilio do Nascimento informa kazu indikasaun Korupsaun Kolusaun Nepotismo (KKN) kontra Ministra Financas Emilia Pires nu’udar dezafia ida ba jornalista Timor Leste atu hakerek notizia investigative tenki balansu ho konkretu hodi hatudu lolos provas konkretu ba publiku. 

Dom Basilio dehan, bainhira media kuandu fo sai informasaun ruma lalos no laiha evidensia forti, entaun ema se de’it maka senti nia naran no identidade foer nia bele kritika hasoru notisia ruma ne’ebe media sira publika. 

Bispo dehan, iha mundu ita ema moris sempre iha buat falsu no buat los, no bainhira media fo sai deit informasaun liu husi isu-isu ka rumoris ne’e mos prejudika ema sente aan la diak no koalia arbiru deit. 

 “Dala ruma buat ne’e mosu intendimentu la iha ne’e primeiru, sigundu bua (kazu) hirak ne’e bele mosu tanba informasaun la klean no dadus la los, no terseiru buat ne’e mosu, ita ema ne’e sentimentu iha kuandu hateten buat ruma lalos, ne’ebe iha situasaun ne’e, kuandu ita boot sira komunikasaun sira, kuandu fo informasaun tenki iha dadus konkretu no provas,” informa Don Basilio ba Jornalista iha Bispkopal Igreja Katolika Dili, Kuarta (12/2). 

Bispo ne’e hatutan, jornalista sira tenki ativu liu iha sesaun investigative klean hodi fo informasaun nu’udar sasin no provas ba nutisia ida nia valor. “Jornalista mak tenki buka atu halo klean liu tan provas sira ne’e,” dehan nia. 

Dom Basilio haktuir tan, iha mundu ne’e kuandu, bainhira servidor sira hotu kualifikadu, buat hotu sei lao diak hodi lori Timor Leste hetan governasaun diak. 

Bispo dehan tan katak, knaar Jornalismu iha mundu hanesan mos jogador (pemain) bola, kuandu atu joga diak presiza trenu maka’as, hodi nune’e bainhira jogador sira halo kompetisaun jogu Futebol ruma labele tebe ema arbiru deit iha kampo. 

“Ita atu joga bola tenki treinu didiak, no labele tebe bola, tebe fali ema nia ain klor, ne’e la fo buat ida,” Bispo fo izemplo. Bispo ne’e mos apela ba media Timor Leste atu kontinua haka’as an hodi sai professional hanesan media iha rai seluk nian ne’ebe fo sai nutisia ruma sempre doko ukun nain sira ne’ebe, karik halo sala ruma, tuur sei la hakmatek.

.