CPD-RDTL Dezkorda Ho Orden Lere “Planeia Uza Tan Distritu Hat Ba Koperativa”

.

Jornal Nacional Diario - Tersa-Feira, 12 Fevereiru 2013 

Conselho Popular Defesa-Republika Demokratiko Timor Leste (CPD-RDTL) dezkorda ho orden husi estadu RDTL liu husi Maijor Jeneral Falintil-Forsa Defesa Timor Leste (F-FDTL) ne’ebe husu atu CPD-RDTL hamamuk fatin konsentrasaun iha Fatuberlihu iha tempu besik. 

 Tuir Porta Vos CPD-RDTL Gil Fernandes da Costa, objetivu koperativa husi CPD-RDTL nian maka hakarak hasa’e produsaun rai laran nian, atu minimiza esportasaun. 

 “Laiha rajaun ami husik fatin ne’e, ami sei mantein nafatin ami nia pozisaun hodi hela nafatun iha ne’eba, tanba aktividade kooperativa lao dadaun ona, neebe hare mos ami kuda ona, nune’e ami hein to’o kua haree. 

Kona ba fatin refere atu tau prizioneiru ne’e loos maibe ne’e mos sei presiza tempo tanba antes to’o iha ne’eba governu tenki kria uluk kondisaun, ne’ebe atu efetivu liu agora governu mos tenki fo apoiu ba aktividade ne’ebe mak CPD-RDTL realiza ne’e, tanba atividade ne’e promove koperativa tuir planu governu nian,” dehan nia ba JNDiario iha sede CPD-RDTL, Balide, segunda (11/2). 

Gil afirma tan katak, foin dadaun maijor Jeneral F-FDTL Lere Anan Timur marka ona nia prezensa iha fatin hodi fo hanoin ba CPD-RDTL katak, CPD-RDTL renke retira husi fatin refere atu nune’e, governu uza fatin ne’e ba prizioneiru sira husi Gleno, Ermera no Becora ba iha ne’eba hdoi halo aktividade, maibe CPD-RDTL sei mantein nia pozisaun hodi kontinua hela iha ne’eba, no sei la sai husi neeba, ho rajaun sei iha fatin seluk ne’ebe governu bele fo ba sira. 

Nune’e, nia dehan tan katak, fatin propriedade estadu nian barak ne’ebe to’o agora la utiliza, tanba ne’e, tuir CPD-RDTL nia planu sei tutiliza hotu hanesan iha Lospalos, Maliana, manatuto no Suai, inklui fatin sira seluk hodi halo aktividade kooperativu atu nune’e TL labele dependente produtu rai liur.

.