“Conoco Fa’an Mina Timor”

,

Jornal Timor Post - Sabadu, 16 Fevereiru 2013 

Ministru Petroliu no Rekursu Minerais (MPRM), Alfredo Pires agora dadaun fo fiar ba kompania Chonoco Philips hodi fa’an Minarai Timor. 

“Mina ne’ebe ita hetan husi Chonoco Philips maka posu husi bayu Undan, agora kuandu hetan ona mina ita mos iha diretu ba ita nia parte atu fa’an mina, agora ita fo fiar ba Chonoco maka sei fa’an mina,” Alfredo ba Jornalista sira iha Parlamentu Nasional, Kinta (14/2). 

Nia dehan, Tinan tolu-tolu ita tenki asina akordu ida dehan, ita boot (kompania) mak kontinua fa’an lai ami nia mina, maibe, to’o ona tempu liu husi Timor Gap ajuda husi Tailandia nian, ita dehan agora ba oin ita mak fa’an ona ita nia mina rasik. 

“Ita mos treinu hela atu fa’an, so ke hau hatene ita balu mos laran taridu hela ho duvidas ba ita nia an rasik, katak serake it abele ka labele, portantu atu dehan ba ita boot deit katak, ohin loron iha Ministeriu Petroliu, hau iha Timor-oan 40 ne’ebe maka asai S2 (Strata 2) tiha ona kona-ba mina,” nia konfesa. 

Tuir nia katak, S1 de’it ohin loron iha ita nia rain 500, ne’ebe lalika taridu no fiar ita nia an hodi la’o neneik. 

“Agora dadaun kompania Chonoco Philips mak fa’an maibe iha fulan Abril agora ita mak fa’an rasik mina,” Alfredo tenik. 

Nia esplika, ita kuandu fa’an ita sei haree nia folin mia ne’e oinsa, hodi hetan osan nune’e bele benefisia povu, no ita nia ema mak sei fa’an diretamente, nune’e ita sei aprende buat barak,” nia akresenta. 

.