“Claudio Tenta Salva Lucia Lobato”

.

Claúdio Ximenes

Jornal Timor Post - Sesta-Feira, 01 Fevereiru 2013 

Prezidenti Tribunal Rekursu (TR) Claudio Ximenes liu husi nia konkluzaun ba pedidu habeas Corpus ne’ebe defeza hatama semana kotuk, tente atu liberta Eis Minitra Justica Lucia Lobato husi Prizaun tanba konsidera desizaun balun la loos iha akordaun Tribunal Rekursu nian. 

Maibe, konkluzaun ne’ebe Prezidenti Tribunal Supremu ne’e konklui labele passa tanba juiz koletivu Tribunal Rekursu kompostu husi Jose Luis Goveia ho Juis Maria Natercia Gusmao la konkorda ho konkluzaun husi Prezidenti TR. 

Mezmu Prezidenti Claudio nia konkluzaun la konsege hetan apresiasaun husi juis koletivu nain rua maibe Prezidenti Tribunal rekursu ne’e nafatin fo nia hanoin hodi desidi desizaun ba Lucia Lobato iha duni violasaun lubuk ida iha desizaun Tribunal nian. 

Claudio konsidera desizaun refere tuir loloos seidauk tranzitu em julgadu, detensaun ne’ebe halo ba Lucia tuir loloos labele ezekuta lai tanba Prosesu balun la’o hela. 

“Tuir hau nia hanoin bele hasai imediatamente arguida rekerente Lucia Lobato husi kadeia,” informa Claudio iha nia karta konkluzaun ba pedidu habeas corpus ne’ebe fo sai iha kuarta (30/1). 

Entertantu, iha fatin ketak defensor Sergio Horani hateten, Juis Claudio Ximenes ema ida deit mak nia tenki obdese ba desizaun koletivu juis nain rua nian, hodi hola desizaun katak, idefere ka la simu pedidu habeas corpus husi arguidu nian advogado sira. 

“Hau hanoin hakordu ne’e sai hanesan juris prudensia ida mezmu hanoin husi juis sira nian la hanesan, hau hanoin ho votus vensidu ne’ebe juiz Claudio hasai ami sei analiza klean,” dehan nia ba Jornalista, Kinta (31/1), iha defensoria publiku, Balide, Dili. 

Tuir observasaun Diariu ne’e, hafoin desizaun Tribunal rekursu fo sai, ekipa defeza konvoka enkontru orjente entre arguida Lucia nia kaben Americo Lopes ho nia oan mane Mauhuran molok hatama fiskalizasaun konstitusional ba Tribunal rekursu iha parte lokraik. 

Hafoin enkontru, espoza Eis Ministra Justica Lucia Lobato ne’e desidi lakohi fo nia komentariu ba media, relasiona ba nia kaben nia kazu, nune’e mos Lucia nia oan mane Mauhuran lakohi atu fo komentariu ba media. 

Tuir observasaun mos hatudu, Kondisaun saude Americo Lopes ho nia oan mane diak hanesan baibain, maibe, Americo hatudu nia sentimentu triste ba nia kaben Lucia ne’ebe oras ne’e iha prizaun Gleno, nune’e, nia kontinua koopera ho ekipa advogadu atu kontinua eziji nafatin justica ne’ebe justu ba Tribunal rekursu nuudar orgaun soberania iha estadu de dereitu demokratiku ida ne’e.

,