“Cancio Sadik KAK”

.

Jornal Timor Post - Sabadu, 02 Fevereiru 2013 

Eis-Ministru Edukasaun (ME), Joao Cancio Freitas, husu (Sadik) Komisaun Anti Korupsaun (KAK) atu halo investigasaun ba nia rasik kona ba indikasaun husi publiku katak, nia halo korupsaun relasiona ho bolsu estudu ba Timor-oan sira, iha nia mandatu IV Governu Knstitusional. 

 “Kuandu imi deskonfia hau, uluk halo korupsaun iha prosesu bolsu estudu ba estudante sira ba eskola iha rai liur, KAK bele mai investiga hau par abele hatene loloos,” afirma Cancio ba Jornalista sira iha Centro Convensaun Dili (CCD), Kuarta (31/01). Cancio hateten, publiku labele rona de’it lia anin hudi deskonfia nia, maibe tenki halo investigasaun profundu hodi hatudu lia loos. 

Nune’e, antes ne’e, Eis Ministru Edukasaun ne’e aprezenta-an ona iha KAK, Farol, Dili, hodi kumpri karta notifikasaun husi KAK atu submete ba investigasaun, relasiona ho kazu korupsaun iha Ministeriu Edukasaun durante nia mandatu IV Governu Konstitusional. 

Reitor Dili Institut OF Technology (DIT) ne’e hetan ona investigasaun sobre projeitu fiziku lubuk ida ne’ebe laiha kualidade, inklui Projeitu balun neebe deskonfia halo tiha ona pagamentu 100%, maibe nia fiziku laiha. 

Alende ne’e, eis ME ne’e mos hetan ona investigasaun husi KAK, kona-ba abuzu poder balun ne’ebe deskonfia nia halo osan Estadu nian ne’ebe deskonfia utiliza ba halo ninia uma modelu istana iha ninia rain. Entertantu, Ministru Edukasaun actual, Bendito Freitas hateten, relasiona kritika husi membru Parlamentu Nasional deskonfia, iha IV Governu Konstitusional iha Ministeriu Edukasaun mosu Korupsaun Koluzaun no Nepotismu (KKN) iha prosesu fo bolsu estudu ba estudante sira hodi kontinua estudu iha rai liur tanba akontese iha Distritu balun de’it maka hetan. 

Nune’e, Bendito Freitas mos rekonese iha dezeklibur tanba distritu balun barak liu e balun la hetan, hanesan failansu akontese iha Bolsa Estudu ne’ebe Governu oferese ba veteranus no Martires sira nia oan durante tinan 2008 too 2012. 

“Depois ami ajustamentu ida ne’e dezeibru boot tebetebes iha bolseiru 543, deskobre katak, 120 ital husi Baucau deois husi fatin seluk e balun laiha, depois numeru 543 ne’e bainhira investiga veteranus ninia oan lolos ne’e 47, seluk ne’e la’e, ami rejumo Bolsa Estudu ba veteranus nia oan sira 2008 to’o 2012 ema nain 47 de’it,” dehan Bendito. Iha Segunda, foin lalais ne’e. 

Nune’e, Deskonfia mosu KKN, tanba Konsellu Administrasaun ne’e reuni para debate de’it rekomendasaun ne’ebe husi Ministeriu ida-idak aprezenta tanba sira la halo eleisaun. 

“Agora husi Ministeriu lori sai mai mak ita la hatene, sese nia naran mai ne’e ami aprova deit ona katak, tantus alunus ba Portugal, ba Brazil, no sira seluk,” dehan Bendito. 

.