“Bendito Sei Hakat Tuir Joao Cancio”

.

Jornal Timor Post - Sesta-Feira, 15 Fevereiru 2013 

Sindikatu profesores Timor Leste (SPTL) deklara katak, atual Ministru edukasaun (ME), Benedito Freitas sei lao tuir lalaok Eis Ministru Edukasaun, Joao Cancio tanba durante fulan lima sai Ministru Edukasaun la hatudu progresu ruma. 

“Ami hakarak fo sai ba publiku katak, iha ona sintimas ministru atual iha kintu governu sei hatudu prestasaun ne’ebe hanesan ho Eis Ministru edukasaun, agora haree ba Ministeriu ida ne’e sei repete prestasaun ida ne’ebe hanesan ho Kuartu Governu Konstitusional,” dehan Portavos SPTL, Agustinho Soares iha konferensia imprensa ne’ebe hala’o iha Eskola ensino Sekundariu 10 Dezembru, Comoro, kinta (14/2). 

Agustinho hateten, SPTL deklara lia hirak ne’e tanba durante observasaun SPTL ninian ba loron 100 Ministeriu Edukasaun, maibe tama ona ba iha 150 ka fulan lima nia laran haree katak, ME seidauk hatudu progresu signifikativu. 

Portavos hanesan mos Vice Prezidenti SPTL ne’e afirma katak, prestasaun husi atual Ministru Edukasaun ne’ebe sei repete tan Kintu Governu Konstitusional, halo SPTL preokupa no esforsu atu bele fo tulun ba Ministeriu edukasaun wainhira Ministeriu ne’e iha vontade atu halo kooperasaun. 

SPTL husu atu atual Ministru Edukasaun tenke esforsu hodi hadia problema ne’ebe durante ne’e mosu iha parte edukasaun ninian hodi labele hakat tuir eis Ministru Edukasaun Joao Cancio iha tempu kuartu Governu konstitusional ninian. 

Ba Kestaun ne’e, Jornalista Diariu ne’e tenta halo konfirmasaun ba iha Ministeriu Edukasaun, Bendito Freitas iha Parlamentu Nasional, kinta (14/2) maibe la konsege tamba Ministru rasik lakohi fo nia komentariu. 

.