“Asesor Media La Traduz Diskursu PR”

.

Jornal Timor Post - Kinta-Feira, 14 Fevereiru 2013 

Jornalista husi media sira iha Timor Leste sente preokupa tebes ho servisu assessor media Prezidensia Republika ne’ebe laiha preparasaun di’ak hodi tradus diskursu Prezienti Republika (PR), Taur Matan Ruak ba lian ofisial Tetun. 

Tuir Jornalista sira ne’ebe mak halo kobertura iha Prezidenti Republika husi instituisaun media hanesan Timor Post, Jornal Nacional Diario, Independente, Suara Timor Lorosa’e (STL), Tempo Semanal, RTTL, ep preukupadu tebes wainhira Prezidenti Republika, Taur Matan Ruak hato’o nia diskursu ho lian ofisial Portugues. 

Tanba wainhira, diskursu ba serimonia remata, jornalista sira sempre husu ba responsavel departementu komunikasaun social iha Palasiu Prezidensial hodi fo diskursu Prezidenti Republika nian ba jornalista sira, maibe, assesor media PR sempre hata’an tradusaun ba tetun laiha. 

“Diskursu Prezidenti lian Tetun Laiha,” hata’an asesor media PR ida wainhira jornalista sira tenta atu husu tradusaun ba lian Tetun, hafoin serimonia entrega karta kredensial iha palasiu Prezidensial Bairu-Pite, Kuarta (13/2). 

 Fallansu ne’ebe jornalista sira sempre simu kulpa wainhira hakerek notisia sobre Prezidenti Republika nia atividade iha lian tetun la hatene atu hakrek saida. 

Ho ida ne’e, Diretor Tempo Semanal, Jose Belo kontaktu kedas ba nia jornalista ho nia maluk sira ne’ebe maka kobertura iha Palasiu prezidenti atu labele halo kobertura wainhira diskursu Prezidenti lian portugues laiha tradusaun husi asesor sira ba lian ofisial tetun. 

“Imi tuir komprende ka lae? Se imi la komprende portugues, diak liu lalika halo kole-an, tuir loloos sira asesor sira tenki prepara,” Jose Belo hateten ho via telefone. 

Maski nune’e, Jornalista sira kontinua husu ba assesor media prezidensia atu kompriende kapasidade jornalista sira, atu nune’e media informa informasaun ne’ebe maka loos no justu ba publiku.

,