“Alkatiri Rejeita Simu Milloens $2 Husi Governu”

.

Jornal Timor Post - Sabadu, 16 Fevereiru 2013 

Deputadu Bancada FRETILIN, Mari Alkatiri rejeita kona-ba informasaun ne’ebe espalla katak oras ne’e nia simu ona osan miloens $2 husi Governu atu ba hala’o negosiasaun Zona ekonomika Mundial. 

“Hau hetan informasaun ne’ebe fo sai husi media katak hau simu ona miloens $2,” Mari Alkatiri koalia asuntu ne’e liu husi debate espesialidade iha Orsamentu jeral estadu (OJE) 2013 iha Parlamentu Nasional, sesta (13/2). 

Tanba ne’e, nia husu ba Primeiru Ministru atu esplika ba publiku kona-ba pozisaun Governu hodi fo fiar ba nia hodi sai reprezetante ba negosiasaun zona espesial ekonomika merkadu nasaun lian Portugues (CPLP). 

Husi preokupasaun ne’ebe Deputadu Mari levanta iha plenaria ba espesialidade orsamentu estadu nian ne’e hetan mos apoiu husi Deputadu Bancada FRETILIN, Inacio Moreira. 

Moreira hateten, informasaun ne’ebe espailha iha komunidade nia leet, ne’e tanba media maka politija demais hodi lori informasaun tun sa’e, nia husu ba media sira atu lalika politiza demais buat ne’ebe mak la devia publika. 

Entertantu, Primeiru Ministru Xanana Gusmao konfesa iha plenaria katak, Dr. Mari Alkatiri nia naran mosu iha lista Governu nian atu sai reprezetante Timor Leste ba negosiasaun zona espesial ekonomika merkadu nasaun lian Portugues, ne’e nia maka sujere. 

“Iha kestaun ida ne’e, hau hamutuk ho eis Prezidenti parlamentu Nasional Fernando la Sama halo enkontru ho Barbero Magalhaes iha 2011, hodi ami rasik maka sujere Mari nia naran, dalan ida ne’e ami hili tanba, ita haree duni kapasidade ema ida-idak nian atu hatuur loloos kestaun kona ba ekonomia social,” nia dehan. 

Xanana hateten, dalan ida ne’e la’os oferta ba Mari Alkatiri maibe liu husi prosesu dezde tinan 2011. Ne’eduni, tuir Xefe do Governu, Serviso ne’e la’os interese Mari Alkatiri nian, maibe interese Timor-oan tomak nian, tanba ne’e, Xanana sujere ba Jornalista sira tenki trava-an oituan. 

“Mari atu ba tur iha ne’eba la’os nia mak hakarak maibe ami mak propoin,” PM Xanana esklarese. 

Ba kestaun ne’e, Antes ne’e mos membru komisaun D ne’ebe trata asuntu Ekonomia no Dezenvolvimentu, Deputada Brigida Antonia Coreia informa, diskusaun komisaun Eventual (KE) propoin ona orsamentu jeral estadu 2013 ba reprezetante negosiasaun zona espesial akonomia social merkadu iha nasaun paizes lian Portugues (CPLP). 

Reprejetante negosiasaun Estadu Timor Leste make is Primeiru Ministru Mari Alkatiri, atual Sekretariu Jeral Partidu FRETILIN ne’e assume responsablidade hodi deskute kona-ba merkadu entre nasaun CPLP nian ne’ebe foin lalais delega husi Primeiru Ministru xanana Gusmao. 

“Doutor Mari foin lalais iha inkontru komisaun eventual membru governu ho deputadu sira propoin ona orsametnu miloens $2 ba delegasaun estadu Timor-Leste nian ba CPLP,” deputada husi bancada CNRT ne’e informa ba Jornalista sira iha parlamentu Nasional, Kinta (14/2). 

Fundus ne’ebe aloka atu hodi halo estudu klean kona-ba merkadu iha Nivel internasional iha CPLP , ho nune’e bele kontrolu diak liu tan inflasaun iha Timor-Leste, maibe, orsamentu ne’ebe husi komisaun eventual aprova seidauk hetan diskusaun iha meja plenaria atu halo votasaun. 

,